Abadabuka eZimbabwe abasebenza kwele South Africa bathi bethuswa ngokukhulunywa ngezinye izizalwane zakulelo lizwe ezithi sokumele abantu bokuza baphume baphele ngoba bayizigebengu njalo bathatha yonke imisebenzi.
Abahlutshwa ngabantu bokuza abatshengisele emigwaqweni ngoLwesihlanu besebenzisa isihloko esithi ‘Put South Africa First’ bathi kumele uhulumende wabo axotshe abantu bokuza. Ukuze sihlaziye udaba lolu sixoxe loMnu. Bongani Mkwananzi, okunhlanganiso yeZimbabwe Community in South Africa, loNkosazana Nokuthula Adonsi, osebenza ewoteleni eCape Town.
UMkhwananzi uthi kuyamangalisa okwenziwa ngabantu laba abathi bafuna abokuza babuyele emazweni abo.
Uthi kumele abokuza babambane kwele South Africa bazame ngamandla wonke ukukhuluma lohulumende ngokwenziwa ngezinye izizalwane zelizwe leli.
Uthi kusobala ukuthi abantu abakhuthaza lokhu ngabafuna kuhleselwa abantu bokuza.
UNkosazana Adonsi ugcizelele esithi abantu benziwa ngumumo omubi wezombangazwe lemithetho eZimbabwe ukuthi bayesebenza kwele South Africa.
Uthi kuzwisa usizi ukuthi kulabanye abathi sokumele abantu bokuza basuswe kwele South Africa.
UNkosazana Adonsi uthi eZimbabwe akulamisebenzi lengqubekela phambili.
Ezinye izizalwane zakwele South Africa zijayele ukuhlasela abantu bokuza besithi bayizigangi njalo bathatha imisebenzi eminengi.
Kasenelisanga ukukhuluma lohulumende wakwele South Africa ngodaba lolu.
