Sokuxokozela emigwaqweni kwele South Africa ngesikhathi abanye abantu bakulelolizwe belungiselela ukungena emafekithali lokumisa izimota ezinkulu bedinga abantu bokuza.
Kulabantu abathi sebedinga abantu bokuza abatshayela izimota zakwele South Africa abadabuka kwamanye amazwe njengalokhu abakukhankaselayo.
Bathi bazangena kumafekithali endaweni zonke zakwele South Africa basuse ngenkani bonke abantu abadabuka kwamanye amazwe abasebenza kwele South Africa bengelamaphepha aqondileyo.
Okwamanje kulabanye abatshayela izimota ababhoda emigwaqweni bedinga izimota ezinkulu ezitshayelwa ngabantu bokuza.
Omunye walabo abenza lokhu ongafisanga ukuthi siveze igama lakhe uthi kababuyeli emuva ngokususa abantu bokuza abasebenza okongekho ethethweni kwele South Africa. Ukunhlanganiso yeAll Truck Drivers Foundation elwisana labantu bokuza.
Omunye wabatshayeli odabuka kwele Zimbabwe ocele ukuthi siveze isibonga sakhe kuphela uthi sebedlela evalweni. UMdlongwa uthi abatshayeli bokuza badingwa ngamehlo abomvu.
Okunhlanganiso yeZimbabwe Cross Border Traders' Association, uMnu. Denis Juru, uthi balakho ukuphindisela emazweni amanengi abantu bokuza izihlobo zabo zingahlaselwa kwele South Africa.
Siphinde saxoxa ngodaba lolu labalaleli abambalwa abasola okwenziwa ngabantu bakwele South Africa.
Kasenelisanga ukukhuluma lohulumende wakwele South Africa ngodaba lolu.