Ukudula kwezinto eZimbabwe sokubangele ukuthi impilo ibe lukhuni ngamandla ebantwini abanengi abavele bebhekane lendlala ephehlwe yikoma komkhathi, kutsho ihofisi yomanyano weUnited Nations ebona ngenhlelo zokuphathisa abalambayo eyeOffice for the Coordination of Humanitarian Affairs (OCHA).
Ithi njalo ngoZibandlela idola leZimbabwe lilahlekelwe yingxenye yohlonzi lwalo, i-50 percent, khona okudale ukuthi intengo yempahla ezitolo ikhwele ngesilinganiso samakhulu ayisithupha, 600 percent.
Sikhuluma-nje imali yeZimbabwe iqhubeka igugudeka njalo idola leMelika elilodwa lithengwa ngenkulungwane zamadola eZimbabwe angamatshumi phose amabili, 20,000.
I-OCHA ithi ngoZibandlela njalo intengo yokudla ikhwele ngesilinganiso samatshumi ayisithupha ekhulwini, 60 percent.
Ibhanga elikhulu lomhlaba eleWorld Bank lithi ilizwe leZimbabwe yilo elilokudla okudula kakhulu ukwedlula amazwe wonke eAfrica lilandelwa ngeleEgypt. Emhlabeni jikelele iZimbabwe ihlezi kuzinga lesibili ikhokhelwa yiArgentina.
Umzekeliso; i-2kg yetshukela ehlelwe ngentengo yama-Rand njalo kusiya ngendawo, ibiza i-R60 kuthi i-10kg yempuphu yona ibiza R115. Isaka le50 kg lithengwa ngeR600.
I 1-kg yenyama ibiza R70 kuthi inkukhu egcweleyo yona ithengiswa ngeR85 endaweni ezinengi.
Umkhokheli wenhlanganiso esebenza lozulu wemaphandleni eyeRural Communitiies Empowerment Trust uMnu Vumani Ndlovu utshele iStudio 7 ukuthi ngempela isimo sibi elizweni.
Forum