Soluzaqala Uhlelo Lokuhlolisisa Umbhuqazwe weGukurahundi

Uhulumende uthi kukhangelelwe ukuba uhlelo lohuhlolisisa umbhuqazwe weGukurahundi eMatabeleland oluzaphathwa zinduna njalo oluphansi kuka Mongameli Emmerson Mnangagwa luzaqala kunyanga ezayo. Loba kunjalo, banengi abachothoza imizamo kahulumende yokupholisa amanxeba abantu abalezihlobo ezabulawa ngesikhathi sombhuqazwe lo eleZimabwe lisanda kuthola uzibuse.
Igqwetha elikhulu lelizwe uNkosikazi Virginia Mabhiza utshele iphephandaba leHerald namuhla ukuba sebelungisa indawo koBulawayo okuzagcinwa khona ubufakazi balabo abazakhuluma lezinduna ngombhuqazwe lo njalo sokuthengwe imitshina etshiyeneyo ezasetshenziswa ngabazathapha imibono kazulu. UNkosikazi Mabhiza uthi uhlelo lolu, olwasungulwa ngoNtulikazi nyakenye nguMnangagwa, lulenjongo yokuthoba inhliziyo zabantu ababulawelwa izihlobo yiFifth Brigade. Ikomishini yeCatholic Commission for Justice and Peace yaloba ugwalo olulesihloko esithi ‘Breaking the Silence: Building True Peace’, olwaveza ucuku olwenziwa yiGukurahundi eMatabeleland leNkabazwe. Ikomishini le yathi iFifth Brigade eyayiphansi kwewofisi kowayengumongameli uRobert Mugabe yabulala abantu makhaza lamalunga ebandla lePF Zapu abazinkulungwane ezingamatshumi amabili – 20,000. Induna ekhokhela uhlelo lolu uMtshana Khumalo uchasisa ngokukhangelelwe ukuba kuzakwenziwa ngoNhlolanja.
“Kuyavela sibili ukuthi makusenzakala siqalise ngenyanga ezayo ukuthi siyefika ebantwini. Yonaleyi iviki isiyaphela siyabe sihlangene kuthi uJanuary nxa ephela sihlangane futhi sibone ukuthi sekuhambe kanganani ikakhulu silungisa amahofisi azaba ku province ukwenzela ukuthi kuhlanganiswe ama province endaweni eyodwa so sifuna ukubona ukuthi iprogress yakhona iyabe isihambe kanganani. Asifuni ukuthi siqalise sibuye sibuyele sifuna i-information ihlale endaweni esafe.”
Loba nje uhulumende eqhubeka ngalol’uhlelo kulabanye abathi impumela yalo kayisoze ithakazelelwe nguzulu. Omunye wabalombono lo nguMnumzana Mehluli Ndlovu oweKezi.
“Into le sibona angani yinto yokudlala nje ukulibazisa abantu it'd just like buying time uyakubona okuyinto kwangkhona lokhu sicabanga ukuthi abantu abakwenzayo khonokhu should come in the forefront and kulabantu abalahlekelwa yinto zabo ezinengi kakhulu abantwana bayadubeka akula mabirth certificate."
UMnu. Mlandu Ncube ohlala eTsholotsho laye uyalusola uhlelo lolu.
"Indlela ephathwa ngayo alusoze luphutshe kahle ngoba akula ocacayo ukuthi kuzakwenzakalani njengoba siyekhuluma indaba zethu iguarantee yokuthi sizaba secure thina esiyabe sikhuluma okwenzakalayo asilayo njalo okwesibili akukhulunywa ukuthi kwenzelwani kumbe nje yimhlangano yokuthi abantu belile bezwe ubuhlungu ngento ezayenzakalayo."
UMnumuzana Mbuso Fuzwayo, okhokhela inhlanganiso elwela ilungelo loluntu eyeIbhetshu Likazulu, uthi kayiqondanga indlela okuqhutshwa ngayo uhlelo lolu.
"Okudanisayo yikuthi akukabi lento ebonisayo ukutshintsha komumo ukuthi abantu benga participeta bekhululekile ukuthi beyekutsho ukuthi okwabehlelayo yini njalo ungakhangela njalo udaba lolu soluthethe iskhathi eside yebo izaqalisa kodwa amboni ukuthi kuyabe kuyi process efitha ama standard ama victim kuyabe kuyi process ezamanipulatwa yi perpetrator."
Obona ngokwethulwa kwemibiko kubandla leZanu PF uMnumzana Farai Marapira uthi bazimisele ukuvezela uzulu impumela yenhlolisiso yombhuqazwe weGukurahundi.
"Ngeke kube lokuxola uma impumela yohlelo lolu lungavezwanga emphakathini. UMongameli wathi uhlose kube lokuxola lokubambana elizweni njalo lokhu kungenzeka indaba ingabanjwa ngendlela okusuthisa umuntu wonke. Sifina abantu beZimbabwe babambane."
Owalwa impi yenkululeko ekuviyo leZIPRA, uMnumzana Casper Sibanda, uyakulandula lokhu.
"Into leyi bekufuze i-involve iZipra leZapu ngoba yibo abahlukunyezwayo so nxa bedinga induna betshiya ama parties lawa ayebulawa kakhulu angiboni kulungile ngoba thina yithi ama victims nxa singekho involved akusebenzi. Labo abakwenzayo mele ba-acknowlwdge bavume baxolise."
Kwake kwenziwa inhlolisiso yombhuqazwe weGukurahundi yikomishini eyayikhokhelwa ligqwetha elizimeleyo, uMnu. Simplicious Chihambakwe, engazange ivezelwe uzulu. Umbhuqazwe lo owaqala ngomnyaka ka1982 wamiswa yisivumelwano sebandla lePF Zapu leZanu PF sokubumba uhulumende womanyano ngomnyaka ka1987, okwenza uJoshua Mqabuko Nkomo angene kuhulumende. UMugabe wayecabangela ukuthi uNkomo wayezama ukumgenqula esebenzisa abahlamuki ababesedlula ikhulu. Wake wathi umbhuqazwe lo kwaba yisikhathi sokuphambana. Kodwa wabhubha engaxolisanga uzulu.