Abaphikisayo bathi seliphelelwe ibandla leZanu PF elifuna ukuguqula isisekelo sombuso welizwe ukwenzela ukuthi uMongameli Emmerson Mnangagwa eqhubeke esembusweni kungafika umnyaka ka2028, okugqitshwa khona amahlandla amabili ombuso wakhe.
Bathi kuyamangalisa njalo ukuba ibandla elibusayo seliphinda ukwenza amaphutha abangela ukuba ibutho ligenqule owayengumongameli uRobert Mugabe ngomnyaka ka2017.
Bathi akumelanga kuguqulwe isisekelo sombuso kusenzelwa umuntu oyedwa inengi elithi sokumele ayehlala emzini wakhe labazulu bakhe.
Kodwa amanye amalunga eZanu PF athi kuqondile okwenziwa ngabanye babo abathi bazakwethula iziqondiso zomthetho ezokuguqula isisekelo sombuso welizwe kunyanga ezayo ezizalawula ukuhlala lokusuka kuka Mnangagwa esikhundleni.
Omele iBikita West edale lephalamende uMnu.Energy Mutodi labanye abakucele leCitizens Coalition for Change elikhokhelwa nguSikhwicamfundo Welshman Ncube bathi bazakwenza lokhu belandela imithetho yelizwe.
Kulamalunga amanengi ebandla leZanu PF labaphikisayo abathi akumelanga uMnangagwa eqhubeke esesikhundleni kungafika umnyaka ka2028.
UMnangwa laye usekhulume kanengi esithi kafisi ukuqhubeka esembusweni. Abanye abantu bathi ukhuluma eziluma ulimi ngodaba lolu.
Isisekelo sombuso welizwe sikubeka sobala ukuba umongameli kumele ahlale esikhundleni okweminyaka elitshumi kuphela njalo kungaguqulwa isisekelo sombuso welizwe akumelanga angene embusweni.
Abafuna eqhubeke esembusweni bathi usebenza kuhle ngakho-ke kumele afeze imisebenzi yakhe kusiyafika umnyaka ka2030.
Ukuhlaziya lolodaba, sixoxe loMnu. Joseph Tshuma omele iPelandaba/Tshabalala edale lephalamende njalo olilunga leZanu PF Central Committee othi kulungile ukuba wonke umuntu ekhulume akufisayo empilweni njengalaba abathi uMnangagwa kumele ahlale embusweni kungafika umnyaka ka2028.
Kodwa uMnu. Fortune Mlalazi olandela ezombusazwe ezimele uthi bafuna ukwephula isisekelo sombuso welizwe abafuna uMnangagwa ehlale embusweni.
“Baqhuba umkhankaso oyingozi owawusenziwa ngesikhathi kusabusa uRobert Mugabe. Bahlokoza amanikazi belizwe.Amasotsha abakhangele njalo kulakho ukuchitheka igazi ngalokhu abakuzamayo.”
Inhlanganiso ezizimeleyo ezigoqela iCrisis in Zimbabwe Coalition leZimbabwe Heads of Christian Denominations zithi akumelanga kuguqulwe isisekelo sombuso welizwe ukuze uMnangagwa eqhubeke esesikhundleni.
Lokhu sokucaphule ezinye iziphathamandla zikahulumende ezithi kumele bethule zwi ngodaba lolu.
Forum