Iqhubekela phambili imizamo yokuguqula isisekelo sombuso welizwe ukwenzela ukuba uMongameli Emmerson Mnangagwa eqhubeke esembusweni kulabanye okubikwa ukuba sebezama ukuphanyeka udaba lolu edale lephalamende, okuzakwenza njalo amalunga edale lephalamende lamakhansila labo beqhubeke besembusweni okwesikhathi esingedluli iminyaka emihlanu.
Kodwa abaphikisayo bathi bazakuvimba lokhu ngazo zonke indlela.
Iphetshana elibhodabhoba enkundleni zokuxhumana liveza ukuba uMnu. Energy Mutodi omele iGoromonzi West edale lephalamende ebambisana loMnu. Charles Moyo, okucele leCCC elikhokhelwa nguMnu. Welshman Ncube, bafisa ukuba kuguqulwe isisekelo sombuso welizwe ukuze uMnangagwa aqhubeke esembusweni kuze kuyefika phose umnyaka ka2033.
Ababili laba bacatshangelwa ukuba bafisa ukuthi kuguqulwe iziqa ezinhlanu zesisekelo sombuso welizwe ezizakwenza uMnangagwa ahlale esikhundleni kungafika umnyaka ka2028, okugqhitshwa khona isikhathi sakhe sokuba embusweni.
Esinye njalo isiqa okumele siququlwe, ngokutsho kwababili laba, ngesilawula ukuba osembusweni akumelanga akhethwe futhi ukuba ngumongameli isikhathi sakhe sokusuka esihlalweni sikamongameli singafika.
Kukhanya besifa njalo ukuba kwengezwe isikhathi sokuba amalunga edale lephalamende lamakhansila labo beqhubeke besezikhundleni zabo njengomongameli kungaguqulwa isisekelo sombuso welizwe.
Okunye njalo bafisa kuguqulwe isiqa sokuthi sokuqhutshwa kweReferendum eZimbabwe kungakatshintshwa iziqa zesisekelo sombuso welizwe.
UMutodi ulobele abezindaba namuhla esithi kuliqiniso ukuthi sebezama ukuguqula isisekelo sombuso loba iphetshana elibhodabhoda enkundleni zokuxhumana livezwe ngabanye abantu isikhathi sokukhuluma ngakho singakafiki.
Uthi bazalubamba ngemfanelo udaba lolu isikhathi singafika. UMoyo omele iMpopoma-Mzilikazi edale lephalamende uyakuphika ukuthi ngomunye wabalobe iphetshana leli.
’Ngiyamangala ukubona imotion leyi okuthiwa yabhalwa ngu baba uMutodi kangiyazi njalo angiphathekanga ekwenzakaleni kwalokhu,’’kutsho uMoyo.
Okhokhela amalunga eCCC edale leSenate akubandla leCCC, uNkosazana Nonhlanhla Mlotshwa, uthi uMoyo uyakuphika lokhu njalo ibandla leli alikusekeli ukuba kuguqulwe isisekelo sombuso.
Kodwa okubandla leZanu PF, uMnu. Malaki Nkomo, uthi kulungile okwenziwa nguMutodi labanye bakhe.
Banengi abaphikisa lokhu. UMnu. Douglas Mwonzora, umkhokheli webandla leMDC-T, laye uthi kulihlazo okwenziwa nguMutodi labanye abafisa ukuba kuguqulwe isisekelo sombuso ukuze uMnangagwa aqhubeke esimbusweni kungafika umnyaka ka2028.
“Ngendlela esaloba ngayo isisekelo kuzakuba nzima ukuba ebeke ama referenduma amabili loba angaze enze njani kasoze aphumelele,’’ kutsho uMwonzora.
Amazwi la asekelwe ngumkhokheli welinye ibandla eliphikisayo People's Unity Party, uMnu Hebert Chamuka, yena othi kumele amabandla wonke abambane ukuze bavimbe okuzanywa ngamalunga eZanu PF labanye abakubandla leCCC.
“Kumele abantu beqale ukusebenza ndawonye ukumisa lokhu kungakayi ephalamende ngoba ilizwe lisebunzimeni obukhulu. Useyehlulekile asingeke simvumele eqhubeke,’’ kugcizelela uChamuka.
UMnu. Nyasha Ncube, ingcwethi kwezombusazwe efundisa ekolitshini yeUniversty of Zimbabwe kuzifundo zombusazwe, uthi kusaselohambo ukuthi uMnangagwa aqhubeke esembusweni kungafika umnyaka ka2028.
UMnangagwa usekhulume kanenginengi ukuba kafisi ukuhlala esikhundleni isikhathi sakhe sokuphumula singafika ngo2028.
Kulabanye njalo abakubandla leZanu PF abangafuni kuzwa ngitsho lakancane ngodaba lolu besithi uMnangagwa kumele asuke embusweni ngo2028 njengalokhu okulawulwa yisisekelo sombuso welizwe.
Forum