Inhlanganiso ebona ngezempilakahle eyeWorld Health Organization kanye lohlangothi lukahulumende weMelika olweNational Institutes of Health zithi kulabantu abayisilinganiso sokungamatshumi ayisikhombisa ekhulwini – 70 percent abahlaselwe yisifo lesi emhlabeni wonke jikelele.
Akwaziwa ukuba bangaki eZimbabwe abalomkhuhlane lo.
UDokotela Edwin Mzingwane, umqondisi wezempilakahle koBulawayo, uthi isimo lesi sibangelwa yikungahambi kahle kwegazi emzimbeni.
"Amavaricose veins yimithambo evame emlenzeni, embaleni lengqagaleni evame ukukhukhumala ehlala ikhukhumele. Uma isingamavaricose veins iyabe isihlala ikhukhumele ingasabohli. Igazi liyabe selinqumile. Ingavuvuka ibebuhlungu ingabi buhlungu ibe ilokhe ivuvuka."
Omunye wabalesimo lesi nguNkosikazi Thubelihle Nkomo.
"Ukungazi kufana lokufa, sengilesikhathi eside ngiyibona imithambo le njalo bengingazi ukuthi iyelapheka. Kubakhona isikhathi lapho eluma khona ngamandla kwesinye isikhathi uzwe ibuhlungu sengize ngikujwayele nje."
Osakhulayo uNonthandazo Ngwenya ohlala koBulawayo uthi imithambo ekhukhumeleyo wayibona eqala ukuthomba.
"Kwangimangalisa ukuzibona ngisiba lemithambo etshengisa igazi ngoba ngivele ngimhlophe. Ekuhambeni kwesikhathi ngike ngazithwala ngisesibhedlela abomongi bangikhuthaza ukuthi ngiyelatshwe lamanje isinganeno kodwa ayiphelu."
UNkosikazi Ntombizodwa Khumalo, umgcinisihlalo wekhomithi yezempilakahle kukhansili yakoBulawayo njalo ongukhansila kaWard 23, laye ukhuluma ngesifo lesi.
"Imithambo le ivame ukuhlasela omama lamankazana asethombile ikakhulu. Bambalwa obaba abalayo njalo iyelatshwa ezibhedlela ezinkulu. Omama bengaya emakilinika ukutathola usizo kodwa sicina sibadlulisele ezibhedlela ezinkulu."
Abezempilakahle bathi isifo lesi kasibulali kodwa sidala ukuba umuntu engahlaliseki ngoba kwesinye isikhathi uyabe esenwaya okungapheliyo. Inhlanganiso yeWorld Health Organization ithi kwesinye isikhathi abanye abalesifo lesi bayahlinzwa esibhedlela ukwenzela ukuthoba imithambo ekhukhumeleyo.
Forum