Ingcwethi kwezempilakahle sezikhuthaze abesilisa abaleminyaka engamatshumi amane kusiyaphezulu ukuba bengavilaphi ukuyahlolwa imvukuzane ehlasela isitho somzimba sangasese.
lnyanga kaNtulikazi emhlabeni jikelele isibekelwe ukulimukisa abesilisa ngokuqakatheka kokuhlolwa imvukuzane le abathi yiprostate cancer ngoba isihamba phambili ekuhlaseleni kuzozonke imvukuzane ezihlasela abesilisa.
UDokotela Derick Mastika oyingcwethi ekwelapheni izitho zabesilisa uthi imvukuzane ehlasela umthambo othwala umthambiso lenhlanyelo yabobaba iyelapheka ingaphangiselwa. Kodwa uthi ingaphuzelwa isichamele ezinye izitho zomzimba kubanzima ukuyelapha.
"Iprostate cancer ilakho ukubamba wonke umuntu oleminyaka engamatshumi amane kusiyaphezulu njalo iya ngokukhula kanye lokulandela imuli. Uma ekhona emulini owake wabalemvukuzane kuvamile ukuthi owesilisa wemuli abelayo kuthi uma umama wakho uma wabanjwa imvukuzane yebele, indodana yakhe ilakho ukuba lemvukuzane yeprostate.
UDokotela Mastika uthi izibonakaliso zeprostate cancer azibonakali uma iqala yikho bekhuthaza ukuhlolwa kusasemasinya.
"Isikhathi esinengi obaba bazibona sebele prostate cancer isichamele umzimba ngoba uma iqala ayibonakali njalo ihamba phezulu kuzozonke imvukuzane ezihlasela obaba. Umuntu uyakhona ukuphila leprostate cancer ingahlolwa yelatshwe kusasemasinya njalo ukubanjwa lumkhuhlane akutsho ukuthi uyafa bakhona abaphila layo kulendlela zakulezi insuku yokuyelapha lokuthi ingamemetheki emzimbeni."
UDokotela Nkosilathi Tshabalala yena uchaza izibonakaliso lokwelatshwa kweprostate cancer.
"Owesilisa uyavuvuka isende lakhe lapho iyabe isifike esimeni sokuthi ingabe isichamele kwezinye izitho zomzimba njalo uma usulalo umkhuhlane, izinso lazo ziyaqala ukukuhlupha futhi uma uleHigh Blood Pressure uphinde ubeleprostate cancer kubanzima ukwelapha lumkhuhlane. Inengi liyaphiswa masinya masinya, kodwa lithambise kancane umuntu asale ezizwa sengathi ufuna ukuthambisa njalo. Ngakho lokhu kuyaphazamisa izinso lokuphuma komthambiso."
Isakhamuzi sakoBulawayo uMnu. Bhekinkosi Nkiwane uthi wakewahlolwa imvukuzane.
"Ngahamba ngayahlolwa iprostate cancer ngisenelisa 40yrs kodwa abayifumananga."
Uqhubeke wathi ubehlala esiyahlolwa yaze yatholakala eseleminyaka edlula amatshumi amahlanu.
"Manje sengile 56 years udokotela ongingihlolayo wathi sengilayo njalo iyelapheka ngoba isaqala. Ngakho ngikhuthaza abesilisa ukuthi bayehlolwa ukuze behlale besazi isimo sabo"
Inhlanganiso yamazwe omhlaba ephethe ezempilakahle eyeWorld Health Organisation-WHO ithi eleZimbabwe likusilinganiso setshumi lane kumazwe womhlaba abhekane lobunzima bemvukuzane yeprostate cancer.
Ngomnyaka ka2020 bathi imvukuzane le yabulala abantu abedlula amakhulu ayisithupha 628, njalo phakathi kwabantu abalikhulu lenkulungwane, abaphose bafike amatshumi amane ekhulwini 38,90 percent bayahlaselwa yimvukuzane yeprostate.
Forum