Inhlanganiso yenguqu eyeZimbabwe Football Association ikhangelelwe ukuba kusasa izaqhuba ukhetho lukamongameli, umsekeli wakhe labazangena kuZifa Board.
Ukhetho lolu luzaqhutshwa ngesikhathi iqembu lelizwe eleZimbabwe Warriors lidlalela imidlalo yalo eqakathekileyo emazwe angomakhelwane.
Kunengi okukhangelelwe ukuba kuzaphuma kukhetho lukamongameli okuncintisana abayisithupha – uPhilimon Machana, Nqobile Magwizi, Marshal Gore, Martin Kweza, Makwinje Soma Phiri loTwine Phiri.
Ukhetho lolu luqhutshwa yiZIFA Normalization Committee ebambisana leFIFA. Bonke abancintisayo banikwe ithuba lokukhuluma leStudio 7 abanye babo bathi kabakhulumi emsakazweni lo. Sixoxe loSoma Phiri kanye loGore.
USoma Phiri uthi okumenze wangena kukhetho lolu yikungaqhutshwa kwenhlelo zeZIFA lokuthakazelela kwakhe umdlalo wenguqu.
UGore yena uthi uzimisele ukulungisa inhlanganiso le njalo lokuvuselela imidlalo yonke yenguqu.
Uphinde wathi kumele kulungiswe inkundla zemidlalo yenguqu.
Abanye akade befisa ukuncintisa kukhetho lolu nguBenjani Mwaruwaru, Walter Magaya, Gift Banda loTemba Mliswa, okuthiwa kabalamaphepha aqondileyo okungena esikhundleni lesi.
Bafika phose itshumi abancintisa kukhetho lokudinga umsekeli kamongameli weZIFA. Kuzakhethwa njalo abazangena kuZIFA Board.
Forum