BULAWAYO - Inkokheli eyenhlanganiso ebona ngokuqhutshwa komdlalo wenguqu elizweni eyeZimbabwe Football Association, eyamiswa umsebenzi, isiphikise inkulumo kamphathintambo wezemidlalo uKirsty Coventry ayethule edale lephalamende ensukwini ezisanda kwedlula phezu kwamacala abawetheswayo kanye lodaba lokubuyela kweZimbabwe ukubayingxenye yemuli yeFederation of International Football Association (FIFA).
Ekhuluma lentathelizindaba ngemva komhlangano abawubize esigodlweni iHarare ngoMvulo, isiphathamandla esasikhangele ingcebo zenhlanganiso yeZIFA, uPhilemon Machana, uthe umphathintambo wezemidlalo uKirsty Coventry ubaninda ngodaka bona bemsulwa kuzo zonke izinto okuthiwa baziphazamisa.
“Sitshengise intathelizindaba ubufakazi obokuthi thina imali esayiphiwayo yinhlanganiso yeSport and Recreation Commission yi$53,000. Sibakhombise incwadi zebhanga ezitshengisa ukuba yangena iyimalini kanye lokuthi yasetshenziswa njani ngo2019. Sibatshengise ubufakazi obenhlolisiso eqhutshwe yibo abe SRC singekho thina, obokuthi imali esaziphiwa kuminyaka emithathu yi$86 500 kuyimali yakuleli eyeRTGS. Injongo yethu bekuyikwazisa uzulu ukuba akula 2 million esayiphiwayo thina.”
UMachana uqhubekele phambili wathi akusilo qiniso futhi ukuthi eleZimbabwe kalikhathali loba lingabuyelanga ukuba lincintise kumncintiswano eqoqwa ngaphansi kokuqondisa kweFIFA.
“Olunye udaba ngolokuthi batshela abantu ukuba asifuni ukubuyela kuFIFA kodwa lelo akusiloqiniso ngoba ngoMvulo odluleyo bebencenga abeFIFA besithi kukhona inguquko esesiyenzile kodwa batshelwe ukuba kumele baqale belandele lokho abakutshelwa kuncwadi abayilotshelwe ngoNhlolanja ka2022.”
Inhlanganiso yeFIFA yatshela abeSports and Recreation ukuba ilizwe leZimbabwe lizavunyelwa ukuphenduka libe yingxenye yeFIFA nxa kungabiselwa uKamambo labanye bakhe.
UMachana uthi kuyisifiso sabo ukuba ugatsha lwezemidlalo ludinge ingcitshi ezizaphenya ukuba leyomali eyizigidi ezimbili zamadola aseMelika okuthiwa bayintshontsha yalobela ngaphi.
“Njengoba umuntu omdala ehlala esithi kulezigidi ezimbili azaphiwa inhlanganiso yeZIFA, lathi sithi akudingwe abafundele umsebenzi wokuchwayisisa ngezimali baphenye ukuba leyomali yayangaphi njengoba phela thina asizange siyibone kodwa yena umphathintambo uthi ulesiqiniseko esokuba wayibona ukuphuma kwayo.”
Ilizwe leZimbabwe limiswe yinhlanganiso yeFIFA ukuphatheka kunhlelo zayo nyakenye ngemva kokuba abenhlanganiso yeSRC betshaye indiva inkuthazo eyokuba akumelanga bangenele ekuqhutshweni komdlalo wenguqu.
Lokho ngemva kokuba inhlanganiso yeSRC imise umsebenzi inkokheli kaKamambo isetheswa amacala agoqela ukungaqhubi kuhle umsebenzi, ukutshaphaza imali kanye lokuhlukumeza onompembe besifazane.