Imdlalo yenguqu yeCastle Lager Premierr Soccer League ikuviki lesibili iqalile.
Ngempelasonto amaqembu wonke adlale imidlalo yesibili.
Lonyaka amaqembu amanengi athenge abadlali beqinisa amaqembu abo kodwa iqembu leHighlanders lavinjwa yinhlanganiso yeFifa ukuthi lithenge abadlali lisetheswa umlandu wokuthi aliholisanga owayengumqeqetshi walo uBaltemar Brito lomsekeli wakhe uAntonio Torres, abadabuka kwelePortugal.
UBrito lomsekeli wakhe uAntonio Torres baphanyeka udaba lweholo labo kuhlanganiso yenguqu eyeFIFA besithi iBosso iyala ukubabhadala. IFifa yapha isigwebo sokuthi iHighlanders ayisavunyelwa ukuthenga abadlali benguqu baze bahlawule inkulungwane ezingamatshumi amabili lesikhombisa zamadollar eMelika – US$27,000 amadola. Unobhala jikelele weHighlanders uMorgen Dube uchaza kabanzi ngohlupho lwabo
UDube uthi iqembu lakhe lilabo abadlali elabathengayo kodwa ngeke libadlalise ngoba basalinde iFifa ukuthi yethule isigwebo njengoba sebabhadala imali leyo.
Lanxa iqembu leHighlanders lingelabadlali abatsha, ngeSonto linqobe eleKwekwe 4 nya eBarbourfields Stadium. Kweminye imidlalo, iqembu leCaps United linqotshwe ngeleScotland FC 2-0; Scottland, Ngezi 1 Green Fuel 0, Bikita Minerals 1 Mwos 1, Tel One 4 Triangle 1, FC Platinum 1 Manica Diamonds 0, Herentals 0 Dynamos 0, Yadah 0 Chicken Inn 0, ZPC Kariba 0 Simba Bhora 0. Iqembu leSimba Bhora yilo elathatha isicoco sePremier League ngomnyaka ophelileyo kodwa lonyaka lidonsa nzima. Alikanqotshwa ngemva kwemidlalo embili.
Umqeqetshi waleliqembu uJoel ‘Dubai’ Luphahla uthi usalolonga abadlali bakhe.
Ohlaziya ezenguqu ezimele uMuziwethu Hadebe uthi amaqembu asebenzisa imali yiwo akhanya ezahlupha lonyaka.
Akwaziwa ukuba kuzahamba njani lonyaka kwezomdlalo wePSL njengoba imidlalo le isanda kuqala lonyaka.
Forum