Ikhansili yakoBulawayo ithi isilungiselela ukususa abathengisa impahla emigwaqweni okungekho emthethweni ilandela isinqumo sika hulumende esokuthi besuswe ngesiphangiphangi.
Umsekeli kameya wedolobho leli uMnu. Edwin Ndlovu uthi isinqumo sikahulumende sihambelana lemizamo yabo yokulungisa uhlupho lolu koBulawayo.
Uthi kade sebesusa abanye abathengisa okungekho emthethweni endaweni ezitshiyeneyo ngoba bebengcolisa imigwaqo njalo bethengisela endaweni ezingcolileyo.
Sixoxe njalo ngodaba lolu loMnu. Michael Ndiweni, umqondisi wenhlanganiso yeBulawayo Vendors and Traders’ Association othi kumele uhulumende alungise indawo okuzahanjiswa abathengisa okungekho emthethweni.
Uthi kungcono uhulumende abelendlela okuzabanjwa ngalo udaba lolu ukuze kungakhahlanyezwa abantu abanengi.
Kubikwa ukuba kulabantu abedlula inkulungwane ezingamakhulu amabili – 200,000 abathengisa emigwaqweni okusemthethweni eHarare. Ikhansili ithi kulabedlula inani leli abathengisa okungekho emthethweni edolobheni leli.
KoBulawayo kubikwa ukuba kulabantu abafika phose inkulungwane eziyisithupha - 5,971, Phakathi kwabantu laba kulabafika phose inkulungwane ezimbili - 1,875 abalengcwadi zokusebenza emigwaqweni okusemthethweni.
Forum