WASHINGTON DC - Inkampani kahulumende ethwala abantu, iZupco, ikhuphule imbadalo yokugada amabhasi lemitshova esebenza iphansi kwayo ngokuphindwe kabili.
I-Zupco yazise ngoLwesithathu ukuthi kusukela ngoLwesine, abagada amabhasi ayo behamba umango ophakathi kwe-kilometer elilodwa kusiya kwangamatshumi amabili, 20 kilometers, bazahlawula amakhulu amathathu amadola eZimbabwe, Z$300, yona ekhwele isuka kukhulu elilodwa elilamatshumi amane, Z$140.
Ukuhamba ama-kilometer angamatshumi amabili lanye, 21 kilometers kusiya kwangamatshumi amathathu, 30 kilometers, khona sokuzabiza amakhulu amane, Z$400.
Limali ikhwele isuka kuZ$180, kuthi abahamba umangano ofika ku40 kilometers bona bakhwezelwe inhlawulo isuka kuZ$220 yaya kuZ$550.
Abagada amakhombi eZupco bona sebezahlawula amakhulu amane, Z$400, ama-kilometer asuka kwelilodwa kusiya kwangamatshumi amabili, 20 kilometers, yona ekhwele isuka kuZ$220.
Ama-kilometer angamatshumi amathathu wona asebiza amakhulu amahlanu alamatshumi amahlanu, Z$550. Limali ikhwele isuka kuZ$260. Imitshova esebenza izimele yona ayikakhweli.
Isiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi inkampani yeZupco isifake abantu ebunzimeni obukhulu.
