WASHINGTON DC - Uphenyo olwenziwe yinhlanganiso yeAfrobarometer oluveze ukuthi abantu abayisilinganiso samatshumi amahlanu lanye ekhulwini, 51 percent, bathi bayamethemba uMongameli Emmerson Mnangagwa, soluphehle inkulumompikiswano.
Kodwa loluphenyo luthi njalo isilinganiso sabangamatshumi ayisikhombisa lambili, 72 percent, sithi ilizwe lisendleleni engayisiyo.
Lufumane njalo ukuthi abantu abasekela ibandla leZanu PF baku44 percent kuthi abasekela iCitizens Coalition for Change (CCC) - yona ekhokhelwa nguMnu Nelson Chamisa - baku42 percent.
Inengi lithi kalisuthiseki njalo ngendlela uhulumende aphethe ngayo umnotho.
AbeZanu PF labeCCC bathi lanxa kukhona abavumelana lakho kuloluphenyo, okunye abavumelani lakho.
Ukuhlaziya loludaba sixoxe lelunga leCCC uMnu Abednico Bhebhe kanye lelunga leZanu PF uMnu Joseph Tshuma onguye osungula lingxoxo.
