WASHINGTON DC - Abogatsha olubona ngokulondolozwa kwezifuyo olweVeterinary Services sebexwayise abafuyi ukuthi badibhise inkomo zabo sikhathi sonke njalo bengazihlalisi egangeni ngoba zilakho ukuhlaselwa yimikhuhlane efana lowe-foot and mouth kanye lowe-theileriosis, owaziwa njalo ngokuthi January disease.
Limikhuhlane isitholakala kwezinye indawo ezigoqela eMatabeland South.
Ngeviki ephelileyo abogatsha lolu babulale inkomo zomunye umlimi ezingamatshumi phose amathathu, 28, eInsiza ngoba besithi zingaba zilomkhuhlane we-theileriosis.
Umlimi lo wayethinte inkomo zakhe esuka lazo eGwanda ezisa eInsiza, okwakuyikwephula umthetho othi abantu akumelanga bathinte izifuyo besiya lazo kwezinye indawo.
Osebenza kugatsha lweVeterinary njalo engowenhlanganiso yeZimbabwe Agricultural Professional and Technical Association (ZAPTA) uMnu Zivaishe Zhou utshele iStudio 7 ukuthi abalimi kumele balandele inkuthazo yabo ngoba belakho ukuphelelwa zinkomo yilimikhuhlane.
