Uhlangothi lukahulumende olubona ngezokulima luthi balutshwana kakhulu abalimi abaletha umumbu eziphaleni zeGrain Marketing Board (GMB) ngakho-ke sokumele kuhlolisiswe ukuba abazimeleyo abathenga umumbu balani eziphaleni zabo.
Umabhalani omkhulu wohlangothi lolu, uMnu. John Bhasera, usanda kulobela abegmb incwadi esithi kumele baphathisane labezomvikela abakuhlangothi lweJoint Operations Command ukuze kulandelwe umthetho wokuthenga lokuthengiswa komumbu eZimbabwe.
UBhasera uthi abalimi sebethengisele iGMB umumbu oyisilinganiso se-5,000 metric tonnes. Bebekhangelele ukuthi bazathola umumbu omnengi lonyaka njengoba kukhanya engani kuvunwe umumbu oyisilinganiso esifika 30,000 metric tonnes.
Kukhangelelwe ukuba amapholisa azabambisana labanye abezomvikela emigwaqweni ekudingeni abathenga umumbu njalo lokuvula ngenkani iziphala zabathenga umumbu ukuze bebone ukuba kwenzakalani elizweni.
Abalimi abanengi bathi abasoze bethengisele iGMB umumbu wabo ngoba bawuthenga ngedola ezimbabwe hatshi eleMelika.