WASHINGTON DC – Bekunyakazela endaweni ezitshiyeneyo namuhla, ikakhulu emadolobheni afana leHarare lakoBulawayo, abantu besehluleka ukuthola izimota zokuhambisa ngoba inkampani yeZupco isilela ngamafutha ephethulo ledizili.
Linkampani yazise ukuthi yehluleke ukuthola amafutha ngesikhathi esifaneleyo. Kodwa ithe akumelanga uzulu akhathazeke ngoba iphakathi kokululungisisa loludaba.
I-Zupco, okuyinkampani kahulumende, yiyo yodwa evunyelwa ukuthwala abantu ikakhulu emadolobheni kulandela ukuvalwa kwemitshova nguye uhulumende.
Amakhombi avunyelwa ukusebenza ngokusemthethweni yilawo aqhuba umsebenzi ephansi kwalinkampani kuphela, okuyinto esidale udubo lokusilela kwezimota ezithwala umphakathi emadolobheni.
Lokhu sokubangele njalo ukuthi ezinye izimota zisebenze ngaphandle komthetho zibalekela amapholisa.
Isiphathamandla senhlanganiso yeBulawayo Progressive Residents Association, uMnu Thembelani Dube, utshele iStudio 7 ukuthi ukusilela kwamafutha ezimota osokuphazamise iZupco kuveza sobala isidingo sokuthi uhulumende avumele yonke imitshova ibuyele emsebenze njalo isebenze izimele.
