WASHINGTON DC - Umanyano weEuropean Union (EU) usuyesule izijeziso zenotho owazethesa umsekeli kaMongameli, uMnu Constantino Chiwenga, umkhokheli webutho uMnu Phillip Valerio Sibanda kanye loNkosikazi Grace Mugabe.
Kodwa lumanyano uthi izijeziso zenkampani yebutho elungisa izikhali, iZimbabwe Defence Industries (ZDI), zizaqhubeka zikhona ngoba uhulumende kaMongameli Emmerson Mnangagwa elokhe esephula amalungelo kazulu.
UChiwenga, uGrace loSibanda yibo bodwa ekade sebesele kuluhlu lwezijeziso zeEU, eyazifakela amalunga eZanu PF lamankampani alobudlelwano lalelibandla iwethesa umlandu wokuhlukuluza uzulu eminyakeni engamatshumi amabili edluleyo.
Abanye ababekuluhlu lolu sebasuswa.
Kumbiko ewethule izolo, iEU, ithe ukuze ivuselele ubudlelwano bayo leZimbabwe, kumele uhulumende ehloniphe amalungelo, eqede inkohlakalo njalo etshiyane lokubumba imithetho emibi efana loweData Protection Act, iPrivate Voluntary Organisations Ammendment Bill kanye lowePatriotic Act.
Ilunga leZanu PF uMnu Joseph Tshuma utshele iStudio 7 ukuthi lanxa bekwamukela ukwesulwa kwezijeziso zikaChiwenga labanye bakhe, bafuna iEU yesule izijeziso eziseleyo ezenkampani yeZDI.
Isikhulumeli somholi webandla leCitizens Coalition for Change (CCC) uDr Nkululeko Sibanda uthe ukubotshwa lokutshaywa kwamalunga ebandla lakhe ngamapholisa ngempelasonto kuveza sobala ukungahlonitshwa kwamalungelo oluntu okuqhubekayo eZimbabwe.
