![Ipassport yeZimbabwe](https://gdb.voanews.com/B7D9920B-402A-4BE7-9693-CB2EFA71E593_w250_r1_s.jpg)
Izizalwane zeZimbabwe kweleSouth Africa sezisole kakhulu uhulumende wazo lehofisi yomeli wakhe kulelolizwe ngemva kwesaziso sokuthi i e-passport yiyo ezatholakala ehofisini esanda ukuvulwa eConsulate yeJohannesburg nge $250 okuyimali ephose ifike i R5000. Ihofisi yethule umbuko othi ngempela yiyo imali le okumele ibhadalwe.
Izizalwane zeZimbabwe kweleSouth Africa zizonde zaganunwabu ngoba zisithi intengo yamaphasiphoti le idlulise amalawulo.
NgolweSihlanu kuviki edluleyo, iConsulate yeZimbabwe eJohannesburg yethule umlayezo isazisa ukuthi isisungule ngokusemthethweni uhlelo lokutholisa abeZimbabwe ama e-passport kodwake azabiza amakhulu amabili legxenye yamadola ($250) okungamarandi aphose afike izinkulungwane ezinhlanu (phose R5000).
Isiphathamandla sebandla leZAPU kweleSouth Africa uMnumzana Godfrey Viki uthi kusegcekeni ukuthi uhulumende ulwa labantu abaphumele phandle kwelizwe.
“I government yazi kahle ukuthi iMatabeleland leMidlands baphila ngeSouth Africa, baphila ngabantwababo abaseSouth Africa. Ma isibacharger imali engaka yenza kube nzima ukuthi abantwana laba bakwazi ukuphila babuye baphilise abazali ababatshiye emuva le ekhaya. Sesiziya eZulwini yini ngayo le iphasipoti.”
Umkhokheli wenhlanganiso yePhoenix Foundation of Zimbabwe uMnumnzana Dumisani Nleya uthi uhulumende akabazweli ngani abantu beZimbabwe ababotshwa nsuku zonke kuthiwa abalamaphepha.
“Iphasipoti esiyilokho esingathi yibasic need. So ngibona kungafanelanga ukuthi uhulumende lo okhona owazibeka ngenkani adulise amaphosipoti kanje angazathi amaphasipoti akhona kabafuni ukuthi abantu bawathathe.”
Owesifazana weZimbabwe uNkosazana Ellen Ndlovu uthi ngezinye indlela uhulumende uthi abafelwakazi abanjengaye lezintandane ngeke bafa babalawo amaphasipoti.
“ISouth African passport Ibiza or R400 or R600. Kungani igovernment yakithi izobiza ipassport ngendlela exake kangaka ezweni lapho ipassport yakhona engabizi kakhulu? Kutsho khona ukuthi abantwabethu labazukulu basazohlupheka.”
UMnumzana Mcasiseli Gwaza uthi iSouth Africa kufuze izibonele ukuthi kungani inengi labeZimbabwe bengelamaphepha.
“Uhulumeni ufundraiser ngathinje kube sihluphekile futhi kunguye osifaka kule iposition yokuthi sidinge amaphasipoti. Umhlaba wonke ungaka alikho ilizwe elinepassport edula kangaka futhi leyo passport izohamba ifuna amavisa kuzo zonke izindawo. There is nothing special ngayo ukuze ifike kuleyo price.”
Umgcinisihlalo wenhlanganiso yeZim Imbokodo uNkosazana Victress Mathuthu uthi bekufanele bavele batsho ukuthi ihofisi yamaphasipoti le bayivulela iziphantsha labomali yavuza kuphela.
“Asisaluboni losizo lwayo ioffice nxa isilapha. Omama bazayithathaphi imali engange $250? Inengi labantu abasebenzi labasebenzayo imalile abayiholi. So ukuze ubekele iphasipoti kumele use uhole kangaki? Siyacela ukuthi ugatsha olubheke lokhu luke lusicabangele ikakhulu singomama ukuthi siphila nzima la eSouth Africa. Sizokwehluleka lokuyithatha phela.“
Imibuzo ebithunyelwe kumeli weZimbabwe uMnumzana David Hamadziripi, ngodaba lokuthi uthini ngezikhalazo zabeZimbabwe laba ngentengo yamaphasipotile, ibilokhe ingakaphendulwa ngesikhathi sisiya emoyeni.
Kodwake kunkulumo eyethulwe emkhosini wokuvulwa kwamahofisi amatsha aweConsulate yeZimbabwe eJohannesburg ngoLweSine, umphathintambo wogatsha lwendaba zasekhaya lamasiko eZimbabwe uMnumzana Kazembe Kazembe uthe luyabathokozisa uhlelo lokwethulwa kwamaphasipotile eSouth Africa.
“Inyathelo lokupha uzulu weZimbabwe kuleli indlela yokuthola amaphasipoti ngumbono kamongameli Mnangagwa owathi kwenza impilo yabasemazweni ibelula.”
Kodwake inengi labeZimbabwe lithi lobanje kulinyathelo elihle kakhulu leli, intengo yawo isibatshiye befana lebhiza elome kakhulu, eligalule ngentamo emanzini kodwa umlomo walo ubotshwe mfi.