Imibono Kahulumende weMelika
- Sithandekile Mhlanga
EleMelika Lilungiselela Umhlangano Wokuhlolisisa Indlela Zokuqeda Impi Ephakathi kweRussia leUkraine
Umabhalane kahulumende weMelika uMnu. Marco Rubio ufikile eSaudi Arabia ngoMvulo phambilini kwenkulumo phakathi kwelizwe lakhe lele Ukraine, okuyimizamo yokuqeda impi elokhe iqhubeka phakathi kwe Russia le Ukraine.
Isikhulumeli seRussia uMnu. Dmitry Peskov ubikwa esithi ilizwe lakhe likhangelele ukuthi eleUkraine litshengise ukuzimisela phakathi kwenkulumo lezi lokuthi ilizwe lakhe libe lobudlelwano obuhle lele Melika.
Ukuhlaziya loludaba, sixoxa loMnu. Tim Muringai, ingcwethi ecubungula ezombusazwe.
- Sithandekile Mhlanga
Ukuqeda Izimpi eMiddle East leUkraine Ngezinye Zezihloko Zendaba Ezikhangelelwe Kumbiko Kamongameli Trump Kusasa eCongress, Kutsho Ingcwethi
Isidingo sokuqeda izimpi eUkraine le Middle East, ukwethesa impahla zamanye amazwe intengo yama tarriffs, lokufinqa uhulumende weMelika, ngezinye zezihloko zendaba umongameli Donald Trump akhangelelwe ukukhuluma ngazo lapho esethula umbiko wakhe wakuqala ngemva kokuthatha kwakhe intambo zombuso okwesibili ngoLwesibili. Intathelizindaba ye VOA uVenorica Balderas Iglesias usethulela loludaba, olutolikwa yiStudio7.
Njengalokho akwenza ngomnyaka ka2017, umongameli Trump ukhangelelwe ukwethula umbiko wakhe enkundleni ye Congress ngoLwesibili.
Impi ye Russia le Ukraine ikhangelelwe ukuba yindaba egudwini kulumbiko kuchasiswa imizamo kahulumende wakhe eyokuba ngumlamlankunzi phakathi kwalabo abalwisanayo.
“Ngifuna ukuthula. Asikhangelelanga ukuya empini okweminyaka elitshumi sidlala imidlalo. Sifuna ukuthula,” kutsho umongameli Trump.
Umongameli Trump ulakho njalo ukuchasisela iCongress ngalapho ami khona kumpi ye Israel le Hamas, lekusasa yeGaza.
Emhlanganweni le ntathelizindaba elenhloko kahulumende we Israel uMnu. Benjamin Netanyahu mhlaka four ngenyanga edluleyo, umongameli Trump wathinta udaba lokuthi eleMelika lingaguqula i-Gaza ibe yi, phecelezi “Riviera of the Middle East,” okutsho ukuthi ibe yindawo ebukekayo.
“Ilizwe leMelika lingathatha lowo mhlaba, liwuthuthukise, lidale inkulungwane lenkulungwane yemisebenzi, konke kube kuhle kakhulu,” kugcizelela umongameli Trump.
Ingcwethi zithi umongameli Trump uzakhuluma njalo ngesizathu sokwethesa ama tariffs kwamanye amazwe.
UNkosikazi Shannon Bow O’Brien isikhwicamfundo kuzifundo eziphathelane lohulumende ekolitshini le University of Texas e Austin wethule umbono wakhe:
“Ngiyakholwa kumbono wakhe, ubona engani engafaka ama tariffs, intengo yempahla izakhuphuka ukwenzela ukuthi abahiqiza impahla bephindele kwele Melika ngendlela yokwenqabela ama tarriffs lawo.”
Umongameli Trump ulakho ukuzihlenga lapho uhulumende wakhe asolwa khona kulandela imizamo yakhe yokunciphisa imali esetshenziswa nguhulumende, eyokuqeda inkohlakalo lokutshaphazwa kwemali, leyokuphungula inani lezisebenzi zikahulumende, konke kusenziwa ngesi phangi-phangi.
“Ngibona engathi uzakuthi yikuvikela ukutshaphazwa kwemali. Ngiyakholwa ukuthi uzalincoma inyathelo alithathayo,”kutsho uNkosikazi Obrien.
USenator Elissa Slotkin weMelika, owayesebenza kugatsha lwe Central Intelligency Agency, ukhethwe ukumela amaDemocrats ekucubunguleni umbiko ozakwethulwa ngumongameli Trump.
UNkosikazi Obrien uthi mhlawumbe abantu beMelika bazalandela amazwi ka Senator Slotkin lo mbiko kamongameli Trump enkundleni zokuxhumana ebulenjini ngoLwesibili ntambama kumbe bebale imcijo emqoka embikweni wakhe ngelanga elilandelayo.
- Sithandekile Mhlanga
EleMelika Lithi Lilakho Ukusungula Uhlelo Lokupha Izinothi Zakwamanye Amazwe iVisa ye "Gold Card" Edulayo Ukuze Bezosungula Amabhizimusi
Umongameli Donald Trump uthi ufuna ukunikeza izinothi ezivela kwamanye amazwe ezifuna ukuhlala eMelika ivisa yeGold Card ebiza amadola eMelika ayizigidi ezinhlanu-five million, njalo i card leli lilandulela uhlelo lokuthi bathole imvumo yokuhlala elizweni lakhe ngokupheleleyo i citizenship.
Umphathintambo kahulumende weMelika uMnu. Howard Lutnick ubikwa esithi uhlelo lolu lulakho ukusungulwa ngemva kwamaviki amabili alandelayo luthatha indawo yalolo obeluvele lukhona olwama EB-5.
Ukuze sihlaziye loludaba, sixoxa loMnu. Tim Muringayi, ingcwethi ecubungula ezombusazwe, ochasisa kabanzi ngohlelo lweEB-5 lolwe gold card.
- Sithandekile Mhlanga
Umongameli Donald Trump weMelika Ukhangelelwe Ukwethula Umbiko Wakhe Emhlanganweni weCPAC Ngomgqibelo
Umongameli Donald Trump weMelika labanye bakhe abe Argentina, Slovakia, leItaly, bakhangelelwe ukukhuluma emhlanganweni osaqhubeka oweConservative Political Action Conference ngoMgqibelo kulandela ukuvulwa kwawo izolo.
Lamuhla, abahlonitshwa abakhangelelwe ukukhuluma bagoqela osanda ukukhethwa ukubangumholi womsakazo weVoice of America, uNkosikazi Kari Lake.
Umhlangano lo, osungulwe izolo ngumsekeli kamongameli weMelika uMnu. JD Vance, ukhangelelwe ukugqitshwa ngoMgqibelo.
Ukuhlaziya loludaba, sixoxe loMnu. Tim Muringayi, ingcwethi ecubungula ezombusazwe, ohlala khonapha kwele Melika.
- Sithandekile Mhlanga
Donald Trump: Ngilungiselela Ukukhetha uNkosazana Keri Lake Ukuthi Abengumholi Womsakazo weVoice of America
Osanda ukukhethwa ukuba ngumongameli weMelika uMnu. Donald Trump ngoLwesithathu uthe ulungiselela ukukhetha owayeyintathelizindaba eArizona njalo ephatheke kwezombusazwe uNkosazana Kari Lake, ukuthi abengumholi womsakazo weVoice of America wona othola imali yokusebenza kuhulumende.
UMnu. Trump wethule lumbiko enkundleni yakhe yokuxhumana ebulenjini eye Truth Social owokuthi uNkosazana Lake, uzakuba ngumqondisi we VOA.
Umsakazo weIStudio 7 uyingxenye yeVOA.
UNkosazana Lake ubikwa ezwanana loMnu. Trump njalo wayeyintatheli yomsakazo kamabonakude owe Fox News esabelweni sePhoenix eArizona.
Wasebenza njengentathelizindaba okweminyaka engamatshumi amabili lasikhombisa 27, watshiya ngomnyaka ka 2021 ukuyancintisa ukuba ngusibalukhulu weArizona.
Kulandela ukwehluleka ukuba nguSenator kuwonalo umnyaka, wathi isabelo seArizona kufanele silandele isinqumo sokuthi kunanzwe abantu beAmerica kuqala.
UMnu. Trump ngoLwesithathu uphinde wathi uzamemezela ukuthi ukhetha bani ukuba akhokhele ugatsha lukahulumende wakhe olwe U.S. Agency for Global Media, olwazakala ngokuthi yiUSAGM, okuyilo olulawula i-VOA leminye imisakazo eyamukela imali kuhulumende weMelika.
Isikhundla leso kufanele samukelwe yinkundla yeSenate. UMnu. Trump uthi ozakhokhela i-USAGM nguye ozasebenza loNkosazana Lake.
Umsebenzi womholi weUSAGM ngowokubona ukuthi abasakazi bayenelisa ukugcwalisa izinqumo zokuthi babe lendaba ezimqotho emazweni lapho okusilela ukwethulwa kembiko ngendlela ekhululekileyo.
Ongumqondisi we VOA okwamanje uMnu. Mike Abramowitz uthumele incwadi ye email ngoLwesine ekuseni esithi ubalile ngodaba lukaNkosazana Lake kodwa kaphiwanga olunye ulwazi ngakho wazi lokho akubale ebulenjini kuphela.
Ulobe wathi: “Ngiyamukela ukuthi kube lokuqhubelana kuhle intambo zobukhokheli e-USAGM lase VOA. Ngizasebenza labaphathi abatsha beUSAGM leVOA ukuqhubelana labo intambo, silandela iziqondiso ezibekiweyo ekukhethweni komholi we VOA.”
Umholi we USAGM ulamandla okuqhatsha lokumisa umsebenzi iziphathamandla zalologatsha kodwa kulandelwa umthetho owabekwa ngenyanga kaMpalakazi 2020, sokufanele isinqumo asithathayo sivotelwe yi Intenrational Broadcasting Advisory Board. Iboard le ilamalunga ayisithupha akhethwa ngumongameli kanye lomabhalane kahulumende. Umsebenzi wabo ngowokuxwayisa umholi ukuthi kuhlonitshwe ukuzimela komsakazo labasebenzelana lawo njalo kulotshwe indaba ezilohlonzi.
Eloba enkundleni yeX, uNkosazana Lake uthe uzizwa ehlonitshiwe ngalelinyathelo ngoba i-VOA ngumsakazo obalulekileyo emazweni omhlaba ekhuthaza ukuthi kube lenhlonipho yentando yabanengi kanye leqiniso.
Uthe ngaphansi kobukhokheli bakhe, uzasebenza gadalala ukuthi umsebenzi weVOA uphumelele ukusabalalisa osokufezwe ngeleMelika emhlabeni wonke.
Umsakazo we VOA uzamile ukukhuluma loNkosazana Lake ngaloludaba usebenzisa abethula imbiko abamkhankaselayo ebulenjini kodwa ulokhe ungakatholi impendulo.
Umsakazo weVOA ngeviki wethulela abantu abazinkulungwane ezedlula izigidi ezintathu 354 million, ngendimi izifika phose amatshumi amahlanu, 49. Umqondisi we VOA uMnu. Abramowitz, wayengumholi we Freedom House njalo eyintathelizindaba lomhleli we Washington Post okweminyaka engamatshumi amabili lane.
- Sithandekile Mhlanga
UMnu. Dube Munkombwe weMDC-T Usekubandla leZANU PF
Owayelilunga leMDC-T uMnu. Dube Munkombwe usetshiye ibandla eliphikisayo waya kwele ZANU PF lapho emukelwe yiziphathamandla zebandla elibusayo ngoMvulo ezigoqela oMnumzana Mike Bimha lo Obert Mpofu.
Bemukelwe njalo nguMnu. Blessing Chebundo, umkhokheli wogatsha olubona ngabavela kwamanye amabandla abangena kuZANU PF, olubizwa ngokuthi yiKumusha Home Ekhaya Program, elomsekeli wakhe uNkosazana Memory Sibanda.
UMnu. Munkombwe oleminyaka engamatshumi amane lanhlanu-45, uthi ungomunye wababumba ibandla leMDC ngomnyaka ka 1999 njalo wake waba ngumgcinisihlalo weBinga Rural District Council wasephatha ezinye izikhundla zobukhokheli kugatsha lwabatsha eBinga, koBulawayo, leMatabeland North.
Utshele iStudio 7 ukuthi akukho okumqoka asekufezele abantu selokhe wabalilunga lebandla eliphikisayo ngakho useuna ukusebenza lebandla leZANU PF athuthukise impilo zabantu.
Kuconjwa Iwofisi yeCCC Ngombala Oluhlaza Okwesibhakabha Ngabacatshangelwa Ukuba Basekela uChamisa
Amawofisi ebandla leCitizens Coalition for Change koBulawayo aseconjwe ngombala oluhlaza okwesibhakabhaka ngabacatshangelwa ukuba ngabalandeli bebandla leli abasekela uMnu. Nelson Chamisa asanda kulitshiya. Amawofisi la abependwe ngombala olithanga.
Ukuconjwa kwamawofisi la kumangalise abalandeli baka Chamisa abasekela uMnu. Sengeo Tshabangu labanye bakhe. Sehlulekile ukuxhumana lesikhulumeli sebandla leli uMnu Promise Mkhwananzi obengadobhi umakhalekhwikhwini wakhe laye okubikwa ukuba usesithi nguye osekhokhela elinye icele leCCC.
Sixoxe loMnu Pashor Sibanda owakhitshiswa nguTshabangu edale lephalamende othi umbala lo ngokunye kwalokhu ababekusebenzisa ibandla leli lisakhokhelwa nguChamisa.
UMnu. Charles Phiri osekela uChamisa kukhanye ubekwamukela okwenzakalayo njalo esithi umkhokheli wakhe wenze kahle ukusuka kubandla leli.
UMnu Alfred Dzirutwe, isikhulumeli secela leCCC elikhokhelwa nguTshabangu uthi sebemangalele emthethwandaba abantu abacombe isakhiwo sabo ngombala oluhlaza okwesibhakabhaka.
UMnu. Dougas Mwonzora umkhokheli weMDC-T laye udla amalahle esithi isakhiwo lesi ngesebandla lakhe ngakho-ke akumelanga sibangwe ngabakubandla leCCC. lsakhamuzi sakoBulawayo uMnu Ben Moyo laye uveza umbono wakhe ngokwenzakalayo kubandla leCCC.
Isakhamuzi sako Bulawayo uMnu. Maluba Mhlaba usola okwenzakala kuCCC lenyathela lokucomba amawofisi esiba yisibhakabhaka.
Kukhanya sekulamacela amanengi aweCCC agoqela okukhanya engani likhokhelwa nguMnu. Welshman Ncube, uMnu. Jameson Timba loMkhwanazi. Lokhu kulandela ukutshiywa kwebndla leli nguChamisa olakho ukusungula elitsha. UNcube usanda kukhokhela umhlangano omkhulu oweCCC lapho obekuhlolisiswa isimo sebandla leli. Kuthehwe izinqumo ezimbalwa emhlanganweni lo okugoqela ukuba bonke abakhethwa okusemthethweni kumele behlale ezikhundleni zabo. Kwelinye icele bathi ibandla leli kumele likhokhelwe nguTimba. UChamisa laye ulakho ukusungula elakhe.
Abantu Abedlula Inkulungwane Ezintathu - 3,004 Batholakala Belegciwane leCOVID-19 eZimbabwe
Uhlangothi lwezempilakahle luthi kulabantu abayisithupha ababulewe ngumkhuhlane weCOVID-19 izolo eZimbabwe kwathi abedlula inkulungwane ezintathu – 3.004 bahlolwe batholakala belegciwane leCoronavirus.
Lubikwa njalo ukuthi umkhuhlane lo usubulele abedlula inkulungwane ezine lengxenye – 4,735 kusukela ngoMbimbitho nyakenye.
Luthi asebehlatshwe ijekiseni yakuqala yokuzivikela kumkhuhlane weCOVID-19 eZimbabwe bafika phose izigidi ezine – 3.9 million kuthi-ke asebehlatshwe eyesibili befika phose izigidi ezintathu – 2.9 million.
Uhulumende uthi umkhakha omutsha oweOmicron uyamemetheka elizweni. USikhwicamfundo Solwayo Ngwenya, osebenza esibhedlela seMpilo, uthi abantu kumele bazivikela kumkhuhlane lo.
Udaba lwabosomabhizimusi abakhala ngezikhathi zokuvula lokuvala umsebenzi siluphiwa nguAnnahstacia Ndlovu
UNcwabakazi Bekuyinyanga Yokukhumbula Ababulawa eGhouta KweleSyria
Inyanga edluleyo, ibi ngeyokunanza iminyaka eyisikhombisa kwaba lesehlakalo sokuhlaselwa komuzi weGhouta, kweleSyria ngezikhali eziletshefu zamachemical weapons. Mhlaka 21 Ncwabakazi 2013, uhulumende kaBashar al-Assad wafafaza umoya wegas emizini yedolobho leDamascus kukhunjulwa ukulabawa okwenziwa abantu abaseSyria ngamasotsha kahulumende ka Bashar Al-Assad, lapho okwabulawa abantu abayinkulungwane lamakhulu amane-1,400, inengi labo kungabantwana, kusentshenziswa umoya ohitshayo, oweSarin.
Njengendlela yokukhumbula impilo zabantu abalahlekelwa ngumphefumulo ngaleso sikhathi, eleMelika selifake abantu abayisithupha -6, abasekela uhulumende ka Assad, abakubutho labamncedisa ngemali, kuluhlu lwezijeziso.
Omunye walabo obekwe kulolu luhlu, nguYasser Ibrahim, kusetshenziswa isiqondiso eseExecutive Order 13894. UIbrahim ufakwe kuluhlu lwezijeziso ngenxa yomsebenzi wakhe wokuphazamisa ubudlelwano obukhona phakathi kweleSyria lamanye amazwe. UIbrahim usebenzise inkohlakalo ukuthuthukisa uAssad, ngasikhathi sinye izizalwane zeSyria ziphela ukufa, zibulawa yikuswela ukudla lemithi yokuzelapha.
Ele Melika lilandela isiqondiso sinye eseExecutive Order 13894, lifake inkokheli embalwa yebutho lakwele Syria phansi kwezijeziso lezi ngokuphatheka kwabo ekuphambaniseni imizamo yokukhumisana umlotha lumiswe udlakela olwenzakala kulowo mhlubulo. Phansi kweziqondiso zebutho ezemelika eze National Defence Forces, umkhokheli webutho uFadi Saqr. Esigabeni sesine, ese 42nd Brigade, kufakwe uBrigadier General Ghaith Dalah. Kuziqondiso zeMelika ezeTiger Forces kuphinde kwafakwa umkhokheli webviyo leHaider uSamer Ismail.
“Inkokheli yebutho leyi, yiyo ekhona manje iqondisa izehlakalo zokubulawa kwabantwana kweleSyria emizini ehlala abantu enjenge Ghouta, kusetshenziswa amabomba lezikhali eziletshefu,” kutsho unobhala obona ngobudlelwano beMelika lamanye amazwe womhlaba, uSecretary of State Mike Pompeo. “Inkokheli yebutho le, isihle yabhidliza isifungo sokungena kubutho sokuvikela lokulondoloza impi yezizalwane zelizwe” Kusukela ngoNhlangula 2020, kusiyafika ilanga lanamuhla, eleMelika selifake abantu abedlula amatshumi amahlana lanhlanu-55, kuluhlu lwezijeziso, ngoba kuyibo abaqoqa izehlakalo zocuku oluqondiswe ebantwini makhaza nguAssad, zokuncindezela abantu bakhe.
Ebhala enkundleni yokuxhumana eyeTwitter, uSecretary of State Pompeo uthe, “Izijeziso lezi ezintsha zifakwe njengesikhumbuzo sokubulawa mahlayana ngocuku kwabantu beGhouta eminyakeni eyisikhombisa edluleyo,” Wathi njalo, “Kasisoze sime ukuqhubekela phambili sifuqa ukuthi kube lokuthula kweleSyria njalo bonke abadala amacala wokuhlukumeza lokubulala abantu abangela cala bathonisiswe lawo macala.”
Umongameli Lushinka weBelarus Usolwa Ngabanengi Ngokwalela Embusweni
Umongameli Alexander Lukashenka, wakwele Belarus, owathatha intambo zombuso okwakuqala ngomnyaka ka1994, unqobe ngesilinganiso esikhulu kukhetho olwenziwe mhlaka 9 Ncwabakazi.
Ukunqoba kukaLukashenka,ngesilinganiso sokungamatshumi athobaminwemibili ekhulwini-80%, kubikwa kuphikiswa zinkulungwane lenkulungwane zabantu bakwele Belarus, inengi labo elihle langena ezithaladeni litshengisela lisola impumela yalolukhetho lisithi ingamanga.
Abezomvikela bahle labo bavuka ngodlame bebhaxhabula lokubopha abakade betshengisela, inthathelizindaba kanye lenkulungwane lenkulungwane zabasekeli bamabandla aphikisayo. Kulabane kwabakade betshengisela abadutshulwe babulawa ngabezomvikela.
Ngemva kokhetho abakhokheli ababili bamabandla aphikisayo bahle babaleka elizweni abagoqela omunye wabancintise kulolukhetho u-Sviatlana Tsikhanouskaya, [Svyat-LAH-nah Tsyi-khah-NOU-skah-yah] ongene encintisa ngemva kokubotshwa komkakhe ingcwethi eloba ezombusazwe ohle wavinjwa ukuncintisa kulolu khetho ngoba evalelwe.
Lokhu kutshengisela kubikwa lokhu kuqhubekela phambili emadolobheni amanengi akwele Belarus. Mhlaka 16 Ncwabakazi kube lombuthano omkhulu ongazake ubonakale kulelo lizwe wenkulungwane ezedlula ezilikhulu,- (over 100,000) zabakade betshengisela esigodlseni salelo lizwe ese Minsk besola impumela yalolukhetho.
Inengi labatshengiselayo ngamalunga omkhankaso wabesifazana, owe“The Women in White” Campaign, asebezinikele impilo yabo ukuhlala besezithaladeni betshengisela, besola udlame olusetshenziswa ngabezomvikhela, kwabatshengiselayo njalo befuna bakhululwe bonke abavalelwe ngamapholisa ababotshelwe ukusola impumela yokhetho lolu.
Abesifazana laba abayabe begqoke izembatho ezimhlophe bethwele amaluba baqale ukubonakala eMinsk, kumaviki amabili edluleyo. Ukutshengisela kwabesifazane begqoke ezimhlophe bephethe amaluba kubikwa sokuqhele kwaya lasemazweni agoqela kwele Germany, Poland, Belgium, Ukraine, lase Russia.
Kusobala ukuthi inyathelo elithethwe ngabantu base Belarus lokuphakamisa amazwi ngokutshengisela bephikisa impumela yokhetho, yisibonelo sokuthi bafuna umbuso ongcono kuloka Alexander Lukashenka, ngoba ungabaphathanga kuhle eminyakeni edlula amatshumi amabili lengxenye ebusa.
Uzulu emazweni womhlaba usesizwa ukukhala kwabantu beBelarus njalo esekela izifiso zabo zokudinga umbuso okhululekileyo ongasiwo wentando kayiphikiswa okhona manje.
Inkokheli yele Melika kanye leyamazwe awezwekazi leEurope, isiveze ukukhathazeka okukhulu ngokuphathwa langokuqondiswa kokhetho lwakwele Belarus, isekela umbono wokuthi impumela yalo awuvezi izifiso zabantu balelo lizwe ngoba luqhutshwe kusimo esingakhululekanga njalo kulokuqila okukhulu okuvezwe yikuvuka ngolaka okwenziwe nguhulumende lapho sokuqansa amazwi ensolo abantu sebengena ezithaladeni betshengisela.
Uhulumende uqondise ulaka lwakhe kwabezindaba, ebopha mahlayana abamabandla aphikisayo bengamiswa phambi kwemithethwandaba behlukuluzwa kanye lokuvala amagagase aletha ubulembu obeInternet, ukuze abantu behluleke ukukhulumisana.
Ekwethekeleleni kwakhe kwelePoland, unobhala obona ngobudlelwano beMelika lamanye amazwe womhlaba uSecretary of State Pompeo uthe,
“Injongo yomhlaba wonke jikelele yikusekela abantu bakwele Belarus, ukuze benelise ukufeza izifiso zabo zokuthola umbuso okhululekileyo, lokuthola ithuba lokwakha lokuthuthukisa ilizwe labo ezivezwa yikutshengisela kwabo. Abantu laba badinga okufuna nje, ngumuntu wonke emhlabeni jikelele, ukubuyiselwa ilungelo labo lokuzikhethela uhulumende ongasebenzela intuthuko yabo njengesizwe. Ngakhoke sikhuthaza inkokheli yeBelarus ukuthi iyeke ekwenzayo, ikhulumisane labenhlangothi zonke zempilo okugoqela abenhlanganiso ezilwela ilungelo loluntu okuyiyo kuphela indlela engaveza ukuzwisisa okufunwa ngabantu beBelarus.”
I-USAID Iphathisa i-Africa Ngemali Yokumelana leCovid 19
Ekuqaleni kukaNhlangula, uhlangothi lukahulumende weMelika eliphathisa amazwe womhlaba kunhlelo zentuthuko olwe United States Agency for International Development-USAID, luphe iizigidi ezingamakhulu amathathu lengxenye zamadola-$350 million emazweni aseSub-Saharan Africa ukuthi isebenzise ekumelaneni lokumemetheka komkhuhlane weCovid-19.
Imali le ijonge ukubona ukuba imisebenzi yenhlelo zethu zokuhlenga imiphefumulo kanye lokunceda amazwe esisebenzelana lawo kulokhu, kutsho uMnu Chris Maloney, umsekeli womqondisi obona ngenhlelo zeMelika ezwekazi leAfrica.
UMeloney uqhubeke ethi kukhona okunye njalo okuqakathekileyo ngokusiza amazwe eAfrica ethi okumenza alale engalele, yibunzima lomonakalo osudalwe ngumkhuhlane weCovid 19.
“Engikhuluma ngakho kumayelana lendaba zomnotho. Siqeda isikhathi esinengi sicabanga ngendaba zokutholakala kokudla, indaba eziphathelane leUSAID………, liyazi ukuthi yimvama sisebenzela emaphandleni kodwa ngalezi nsuku lasemadolobheni soluqansa loludubo lwendlala. Uma ulabantu abanengi abakulockdown, kuhleleka njani ukuthi izimali zihanjiswa njani ebulenjini amacash transfers, ukuhanjiswa kwemphahla ezisuka emikhambo yemaphandleni isiya emadolobheni ikakhulu ukudla ukuze abantu bakuthole emadolobheni. Lokhu kumqoka.”
“Udubo esihlangana lalo okwamanje emazweni eAfrica yikusebenza lamazwe angazinekelanga ukusiza abantu babo ezikhathini zobunzima okuyizinto ezenqabele ukuncediseka kwala amazwe njalo basebenzisa umkhuhlane weCovid ukuqinisa umbuso wabo woncindezelo kuzwekazi leAfrica” kutsho uMaloney.
“EZimbabwe sikhuluma kanje kulabantu abedlula inkulungwane ezingamatshumi amabili- 20 000, ababotshiweyo besetheswa amacala okwephula iziqondiso zeLockdown. Kulemibiko njalo yokwephulwa kwamalungelo oluntu, ngakho kumele sicabange kabanzi ukuthi singasebenza njani lenhlanganiso ezizimeeyo uma kulenkinga ezinje.”
Kunjalo nje uMaloney uchaze ukuba kulalemibiko yamanga esabalaliswayo ngomkhuhlane weCovid.
“Ngakho kulemali ethile esesithe sayisebenzisa eSahel lamanye amazwe eWest Africa kumisakazo lenhlanganiso ezizimelyo ekumelaneni lemibiko yamanga ekuthini sikhuphe imibiko yeqiniso kulamazwe ngomkhuhlane weCovid-19.”
UMaloney uchaze ukuba ulethemba lokuba, ubudlelwano bobungane lolwazi abalalo ekusebenzelaneni lamazwe awezwekazi leAfrica okweminyaka leminyaka, kuzabanceda kunhlelo zokumelana lobunzima kanye langomonakalo osudalwe yiCovid-19 kanye lokuqhubeka kwezinye inhlelo zentuthuko ezigabeni ezehlukeneyo zempilo.
EleMelika Lisebenzelana Labangane beGulf Ukuqinisa Impi Yokuqeda Imisebenzi Yabalwa Becatsha YamaTerrorists
Phansi kohlelo lokumelana lemisebenzi yabalwa becatsha, olweTerrorist Financing Targeting Center-TFTC, uhulumende weMelika esebenzelana labangane bakhe bamazwe aweGulf, wenelise ukuqinisa impi yokulwisana labenhlanganiso zabalwa becatsha, amaterrorist organisations emhlubulweni oweMiddle East lasemhlabeni jikelele.
Amazwe abambisana leleMelika kulolu hlelo, abalisa eleSaudi Arabia, Bahrain, Kuwait, Oman, Qatar kanye leUnited Arab Emirates. Kulolu hlelo amazwe la, ayisikhombisa, ayabelana ulwazi oluqakathekileyo olunganceda ukulondoloza ezomvikela.
Lokhu lwasungulwayo lolu hlelo lweTFTC, ngomnyaka ka2017, amazwe la, asesebenze ndawonye kumahlandla amahlanu, belwisana labalwa becatsha- amaTerrorist, angamatshumi ayisithupha (60) lenhlanganiso lamaqembu abo, emazweni atshiyeneyo emhlabeni jikelele agoqela abamaqembu anjengabo ISIS, al-Qa’ida, Labanese Hizballah kanye lama Taliban.
Kusikhatshana esisanda kwedlula, abeTFTC, bethule umbiko wezijeziso eziqondiswe ebantwini abayisithupha abasebenzelana lamalwecatsha aweqembu leISIS, emizameni yokuvimba leliqembu ukufinyelela izimali zokuqhubekisa impi yabo emhlabeni jikelele.
Izijeziso lezi ziqondiswe kumankampani akumsebenzi wemali amathathu, akweleSyria, athi eye al Haram Exchange, Tawasul Company, al-Khalidi Exchange, kanye losetshenziswa ukuhambisa izimali zeISIS emhlabeni jikelele uAbd-al-Rahman Ali Husayn al-Ahmad al-Rawi, kanye lomqondisi wenhlanganiso eyeNejaat Social Welfare Organization, yakweleAfghanistan, uSayed Habib Ahmad Khan. Amankampani lawa lalaba bantu, abaphansi kwezijeziso lezi, nxa imphahla yabo loba izimali zabo zingatholakala, bahle bavinjwe ukuzifinyelela.
Amabhanga bengathola lolo lwazi baxwayiswa ukuba bazise iwhofisi eye Office of Foreign Assets Control-OFAC. Iziqondiso zeOFAC zalisa ukwenza ibhizimusi phakathi kweMelika lalabo bantu ukuhlawula loba ukwamukela imali phakathi kwelizwe kumbe emazweni lapho eleMelika elingafinyelela ukuvimba lelo bhizimusi, ihle ithathwe imphahla lenotho yonke yalowo muntu. Iwhofisi le ivimba izizalwane zeMelika ukuthi zibe lobudlelwano labantu abaphantsi kwezijeziso.
Unobhala obona ngezemali kuhulumende weMelika, uTreasury Secretary Steven Mnuchin, uchasise kabanzi ngabakwenzayo, phansi kohlelo lweTFTC, oselwenelise ukuphazamisa imisebenzi yamaTerrorist emhlabeni jikelele. Uphinde wathi, uhlelo lolu soluqinise ubudlelwano obukhona phakathi kweleMelika, lamazwe aphansi kwaloluhlelo.
Unobhala wezobudlelwano beMelika lamazwe womhlaba, uSecretary of State, Mike Pompeo yena uthi, uhlelo lwe Terrorist Financing Targeting Center, lukhona ukuxwayisa amaTerrorist, lababasekelayo ukuthi batshiyane lalumkuba ngoba bezabanjwa bajeziswe.
Forum