Zihlaba omkhulu umkhosi izakhamizi zeGwanda ngodubo lokuswela amanzi kulandela inyathelo lenhlangothi olubona ngomsebenzi wokutholisa uzulu amanzi, olweZimbabwe National Water Authority(ZINWA) lokuvalela umanisipala walelidolobo amanzi ngenxa yesikwelede sezigidi phose ezimbili zamadollar($193.2million).
Lokhu kuza ngesikhathi lelidolobho lilwisana lokumemetheka kwegciwane leCoronavirus, izakhamizi sezibanjwa ngamandla ukusebenzisa amanzi angahlanzekanga okulakho ukudala eminye imikhuhlane.
Abahlali beGwanda badla amalahle ngokuvalwa kwamanzi besithi lokhu kubafaka engozini yokubamba imikhuhlane enjengeCovid 19, isihudo leminye.
NgoLwesine weviki eyedlulileyo impompi zivuke zome qha, umanisipala wabikela izakhamizi izolo ukuthi lokhu kudalwe yikuvalwa kwamanzi yiZinwa ngenxa yesikwelede.
Lokhu sekudale ukuba izakhamizi zibuthane ngobunegi lapho zisikha amanzi ezikotsho lasemfuleni okulakho ukudala ukumemetheka kweCovid 19, kutsho uNkosikazi Betty Sabanda esinye isakhamuzi seGwanda.
“Into le yasukela kudala sihlala sivalelwa amanzi, bayasivalela amanzi abasitsheli lesizatho ukuthi yindaba besivalela amanzi ngapha liyasitshela ukuthi kuleCovid , iCovid yenu lithi sihlale sigeza izandla nsukuzonke kodwa amanzi asiwatholi.Ikhansili abakhulumisane leZinwa kodwa thina asikungekeni sifuna amanzi.”
Okungamazwi asekelwe ngesinye njalo isakhamuzi seGwanda uNkosikazi Yvonne Zulu.
“Siyahlanzeka ngani nxa kungelamanzi, siyageza ngani izandla zakhona nxa kungelamanzi njalo kuyabe kuthiwa akumelanga sibuthane kodwa khangelani ukuthi abantu babuthene njani ngendaba zokuthi akulamanzi abantu yikho lapho abathola khona iCorona khonala.”
UKhansila kaWard 9 uMnu Thulani Moyo uthi ubhode ngedolobho wazibonela ngawakhe ingozi ekhona ngenxa yokuswelakala kwamanzi.
“Lapho okulamaboreholes kuminyenye abantu bathwele nzima , social distancing ayikho lamamask abanye bawatshiyile indaba leyi izalimaza abantu beGwanda abantu bakha eMtshabezi amanzi untreated water abanye as far as emabhopomeni.”
UMeya wedolobho leGwanda uMnu Njabulo Siziba uthi umanisipala kalamali kungakho sebecele umphathintambo obona ngezenzakala eZansi yemaNdebeleni uMnu. Abedinico Ncube ukuthi angenele kululodaba.
“Kathesi umanisipala kalamali sesicele abadala ubaba uNcube khonangale , isimo sibi ,akula sibili ukuthi ngingathi kulemali ekhansilini eyokuthi kathesi singathi sesihamba ukuyabhadala engxenye ngo 5 amanzi ayabe sekhona, lisibekezelele silinde impendulo ezavela kuMinister of State.”
UDokotela omkhulu esiqintini seGwanda uMnu. Blessed Gwarimbo uthi ukuswelakala kwamanzi lokhu ngalesisikhathi seCovid 19 kuyingozi njalo kulakho ukudala ukuqhamuka kwesihudo kulelidolobho ngoba inengi labantu selisebenzisa amanzi angahlambulukanga.