UMongameli Cyril Ramaphosa wakwele South Africa usebumbe iqula labaphathintambo abazahlolisisa udaba lokutshiswa kwezimota ezinkulu ezithwala impahla, ezilabatshayeli abakhahlanyezwa yizizalwane zelizwe leli ezithi abanye abatshayeli bazo abadabuka kwamanye amazwe babathathela imisebenzi.
Iqula labaphathintambo leli ligoqela abogatsha lwendaba zasekhaya, olwamapholisa, olwezemisebenzi lolwezokuthutha.
Umqondisi wogatsha lwezemisebenzi, uMnu. Thobile Lamati, uthi iqula labaphathintambo leli lizakwethekelela amankampani alezimota ezinkulu lihlolisisa ukuthi kawaqatshanga yini abatshayeli abaselizweni ngokungekho emthethweni.
“Sizaphinda njalo ndawonye lamapholisa sivimbe imigwaqo sizingela abatshayeli abasebenza ngokungekho emthethweni.”
Uthi umsebenzi wabo wakuqala ngowokuqeda udlakela oluqhubekayo lokubopha labo abalubangelayo. Uthi okwamanje bakhona asebebotshiwe ngaloludaba njengoba sekutshiswe amaroli edlula amatshumi amathathu kwafa umtshayeli oyedwa, kwalimala abanye.
Kodwake umnumnzana Sifiso Nyathi omela enye yenhlanganiso yabatshayeli bakweleSouth Africa eye ATDF uthi abalalo ithemba elikhulu lokuthi iqula labaphathintambo leli lizasiza kuloludaba.
“Ngilo 50% wethemba ngoba abasibo bokuqala. Abekhona namanye amatask team phambilini awazange enze lutho. Nalokho ukube sitshelwanje ukuthi kuzokuba namaroadblock, kuzoba namapermit, kuzoba no inspector, asidingi amapermit nabo inspector. Sidinga isinqumo esithi abantu bangaphandle abehle amaroli. 0% foreigners kutrucking industry. 0%.”
Inengi labatshayeli beZimbabwe lithi lilokwesabela ukuthi iqula labaphathintambo leli lizakwenza baphelelwe ngumsebenzi njengoba selikhuluma ngokuvimba imigwaqo lokubazingela emankampanini abaqatshwe kuwo. Abanye bathi kusobala ukuthi loludlakela luzaqhubeka ngoba kusegcekeni ukuthi abatshayeli baseSouth Africa kabafuni ngitsho lomtshayeli olepermit emarolini.
Kodwake umtshayeli weZimbabwe umnumnzana Dayson Mukwewa uthi likhona ithemba lokuthi iqula labaphathintambo leli lizakwenza isimo sodlakela sibe ngcono.
“Ngilethemba lokuthi bangenza umsebenzi wabo in a professional manner. Because uyabona itask team iba involved nama government officials from ama different government department, so I don’t think kuzoba nenkinga yokuthi batargethanje ama foreign drivers, no.”
Lobanje ekuqaleni komnyaka kwethulwe iqula likahulumende elibheke loludlakela, imibiko itshengisa ukuthi sekulamaroli edlula amatshumi ayisitshiyagalombili atshisiweyo kumbe azanywe ukutshiswa lokulinyazwa selokhu umnyaka uqalile.
Your browser doesn’t support HTML5
URamaphosa Uthi Sebehlolisisa Ukutshiswa Kwemota Ezinkulu eSouth Africa