Uhulumende wakwele South Africa uthi kasoze aqhubekele phambili enika abadabuka eZimbabwe amaphepha okuhlala lokusebenza kulelolizwe kulabo abaphethe abizwa ngokuthi ngama Special Zimbabweans Exemption Permit (ZEP).
UNkosazana Phumla Williams, isikhulumeli sedale labaphathintambo bakahulumende, uthi sebehluze udaba lolu bakubona kufanele ukuba belumise uhlelo lolu.
UNkosazana Williams uthi bonke abakuhlelo lolu bazanikwa umnyaka ukuba badinge eyinye indlela yokusebenza lokuhlala kwele South Africa.
Umbiko wakhe lo awethule ebulenjini beInternet kukhasi lesikhulumeli sikahulumende, uNkosazana Williams uthi idale leCabinet likunanzelele ukuba kulezinye indlela zokuba abalama permits la balungise amaphepha abo ngemfanelo.
Kukhangelelwe ukuba abazakwehluleka ukwenza lokhu bazabiselwa kwele Zimbabwe ngenkani.
UMnu. Bongani Mkhwananzi, isikhulumeli senhlanganiso eyeZimbabwe Community in South Africa, uthi kumele bonke abaphansi kohlelo lolu bedinge indlela zokuhlala lokusebenza kwele elizweni leli ngesiphangiphangi.
Your browser doesn’t support HTML5
Udaba Esilethulelwe NguThuso Khumalo