Usuqalile umhlangano omkhulu oweCongress owebandla leZapu okulabantu abambalwa, abagoqela uMnu. Sibangilizwe Nkomo, abafisa ukungena esikhundleni sikamongameli webandla leli esake saphathwa ngumuyi uJoshua Mqabuko Nkomo loDumiso Dabengwa.
Athe gwaqa amalunga ebandla leZapu eCentenary Park koBulawayo okwenzelwa khona umhlangano weCongress okwakumele wenziwe ibandla leli lisakhokhelwa nguDabengwa, owayengene esikhundleni sika Nkomo.
Bathi isifohlile inkunzi ngoba kukhanya belosekelo olumangalisayo. UMnu. Patrick Ndlovu, isikhulumeli sebandla leli, uthi abantu bavela endaweni ezitshiyeneyo ezigoqela abadabuka eZimbabwe abahlala kwamanye amazwe.
UNdlovu uthi bambalwa abafuna ukungena esikhundleni sikamongameli.
UNkosikazi Thoriso Moyo, owalwa impi yenkululeko, uyakuthakazelela okwenzakalayo.
Omele abalwa impi yenkululeko bekubutho leZIPRA, uMnu. Ben Ncube, uthi sebeyivuselela iZapu.
Ozakhethwa ukuba ngumongameli webandla leZapu, ukhangelelwe ukuba uzakhulumisana lohulumende ngezakhiwo ezahluthunwa nguhulumende kamuyi uRobert Mugabe. Zigoqela amapulazi, amawofisi lengwalo ezimumethe imbali yeZapu leZIPRA.