Ezinye iziphathamandla zebandla leZanu PF eziyiziphathamandla zengatsha zikahulumende zibikwa zilakho ukudliwa kukhetho lwama primaries olwebandla leli lokudinga abazancintisa kukhetho lwedale lephalamende leSenate.
Kulabancintisayo phose ikhulu kukhetho lwama primaries ukuze bagcwalise izikhundla ezifika phose amatshuni amabili esabelwenu seMatabeleland South.
Iziphathamandla zengatsha zikahulumende ezigoqela uMnu. Simon Khaya Moyo, Abedinico Ncube, Obedingwa Mnguni, abangamalunga edale lephalamende okwamanje abanjengo Andrew Langa loNkosikazi Tambudzani Mohadi, kuzamele babophe ziqine ukuze babuyele ezikhundleni zabo.
UKhaya Moyo uzangqikilana loMnu. Richard Ndlovu kanye loMnu. Phumuza Ndlovu kuma esiqintini seBulilima.
Umphantintambo wezenzakala ezansi yeMaNdebeleni, uMnu. Abedinico Ncube, yena uncintisana lentathelizindaba olodumo oke wasebenzela umsakazo oweZBC engakayi eKhulumani FM, uMnu. Omphile Marupi lo Mnu. Andreas Matibela.
UMnu. Obedingwa Mnguni uzahlangana loNkosikazi Meita Moyo.
Umgcinisihlalo weZanu PF eZansi yeMaNdebeleni uMnu. Rabelani Choeni uthi amalunga ebandla lakhe angene ngobunengi kukhetho ngoba sekulombuso omutsha elizweni.
UChoeni uzancintisana loNkosazana Tambudzani Mohadi yena ongasazwanani lomkakhe umsekeli kamongameli welizwe uMnu. Kembo Mohadi, kukhetho lokudinga ozamela iBeitbridge kudale leSenate.
Abanye abalakho ukungasabuyeli kukhetho babalisa umeli wedale lephalamende edolobheni leGwanda uMnu. Edson Gumbo yena ozabhekana loNkosazana Cecilia Ndubiwa loMnu. Trynos Nkomo, odume ngokwemba igolide loJaphet Dube.
UMnu Andrew Langa eziqindinti seInsiza North uzantisana lamalunga ayisikhombisa agoqela uMnu. Patrick Hove loMnu. Vumani Moyo.
Ngokufanayo, eInsiza South uMnu. Malaki Nkomo kuzamele abophe ziqine ukuze anqobe abanye abayisitshiya ngalombili abafuna iskhundla sakhe abagoqela uMnu. Jabulani Dube loMnu. Spare Sithole.
OkaNkomo uthi ubunengi babantu abafuna ukumela iZanu PF kuveza obala ukuthi lelibandla lilosekelo olukhulu.
Uphinde wathi ubona elethemba lokunqoba ngoba esebenzele uGodlwayo kakuhle eminyakeni emihlanu eyedlulileyo.
EMzingwane bahlanu abafuna isikhundla esisaphethwe nguMnu. William Dewa kuthi eBeitbridge East bayisithupha abafuna isikhundla esesitshiywe ngumsekeli kamongameli welizwe uMnu. Kembo Mohadi.
Inengi lamalunga la ayaphithizela okwamanje ekhankasela ukhetho lolu lwama primaries. Kulezihlalo ezingamatshumi amathathu ezamalunga edale lephalamende kanye leziyisithupha ezedale leSenate eZansi yeMaNdebeleni.
Ukhetho lwama primaries olweZanu PF lukhangelelwe ukuqhutshwa ngayonale impelasonto kamhlaka 29 Mabasa.
Your browser doesn’t support HTML5
Udaba Esilethulelwe NguAlbert Ncube