Abacubungula ezombusazwe bathi kuzakuba nzima ukususa ibandla leZanu PF embusweni njengoba kuyilo eliphethe ezokhetho, ibutho, amapholisa lezinye inhlangothi zikahulumende ezilakho ukuvimba ukuba kungene ibandla eliphikisayo embusweni.
Abanye abathandabuza okungenziwa ngamabandla aphikisayo ekususeni ibandla leZanu PF elibusayo embusweni bathi kungeke kwenzakale lokhu kuze kulungiswe indlela iZimbabwe Electoral Commission eqhuba ngayo ukhetho.
UMnu. Michael Ndiweni, ocubungula ezombusazwe ezimele, uthi uhulumende kukhanya ezibambe kunhlangothi ezinengi okwenza kube nzima ukuthi ibandla leZanu PF lisuswe esikhundleni.
UNdiweni uthi okunye okwenza kube nzima ukususa iZanu PF embusweni yikuthi amalandeli bamabandla aphikisayo bayadlephana okungapheliyo.
Lokhu kusekelwa nguMnu. Sipho Ngulube, ocubungula ezombusazwe ezimele, othi kunzima ukuthi ibandla elibusayo lisuswe embusweni okwamanje.
Kodwa uMnu. Nkululeko Sibanda, isikhulumeli sikamongameli webandla leMDC Alliance, uthi iZanu PF izaphuma embusweni ifuna kumbe ingafuni.
Sekulungiselelwa ukhetho oluzakwenziwa ngomnyaka ka2023 eZimbabwe. Amabandla aphikisayo kukhanya engani kawathathi isinqumo sokusebenza ndawonye ngesikhathi kulungiselelwa ukhetho lolu.
Your browser doesn’t support HTML5
Lizazuswa Embusweni Na Ibandla leZanu PF Ngokuvota Kuphela?