Umhlaba wonke jikelele ukhangelelwe ukuthi uzathakazelela usuku lokunanza intathelizindaba olweWorld Press Freedom Day ngoLwesihlanu.
Usuku lolu lwenziwa lonyaka ngaphansi kwesihloko esithi ‘Media for Democracy: Journalism and Elections in Times of Disinformation’.
Lonyaka kuhlolisiswa okungenziwa ngabezindaba ukwenzela ukuthi kube labohulumende ababalulekileyo ngesikhathi kulemibiko eminengi engamanga okuthiwa ngeSilungu yi-Fake News. Kukhangelelwe ukuthi intathelizindaba zizahlolisisa njalo ezibhekane lakho nxa kusenziwa ukhetho emazweni atshiyeneyo.
Kusukela ngoLwesibili kusiyafika ngoLwesihlanu, sizabe sixoxa lentathelizindaba kanye lozulu ngokuphathelane ngemibiko eyethulwa kumaphephandaba, emisakazweni lasebulenjini bokuxhumana obunjenge WhatsApp, iFacebook, Twitter lokunye.
UMnu. John Masuku, umsakazi olodumo, uthi inking ekwethulweni kwezindaba yikuthi ezinye intathelizindaba ziloba indaba ezingamanga.
“Kumele intathelizindaba zilandela ezakufundiswa emakolitshini okunjengokuthi kwenzakaleni, ngaphi, kutheni, njani … Lokhu kuzakwenza ukuthi intathelizindaba zilobe iqiniso sonke isikhathi. Okuzwisa usizi yikuthi kulezinye intathelizindaba ezimemethekisa amanga ebulenjini bokuxhumana okwenza ukuthi kube nzima ukuthi abantu babekwazi okungamanga lokuliqiniso.”
Uphinde wathi kuqakathekile ukuthi uhulumende abumbe imithetho esekela konke okufiswa zintathelizindaba.
Your browser doesn’t support HTML5
Ingxoxo Esiyenze LoMnu. John Masuku