Ele Zimbabwe limanyane lamanye amazwe womhlaba ngoMvulo ekunanzeni umsebenzi wokulwisana lemikhuhlane yemvukuzane etshiyeneyo ele World Cancer Day phansi kwesihloko esithi #WorldCancerDay, #lAmAndWill.
Injongo kuyikukhuthaza ukuhlolwa kusaselesikhathi ukuze abantu bathole usizo lokwelatshwa.
KoBulawayo iziphathamandla zempilakahle zikhuthaze uzulu ukuba ayehlolwa imihlobo eyehlukeneyo yemvukuzane kusasemasinya ngoba inani labantu asebetholakala belayo lokhu liqonga ngokuhamba kweminyaka.
Obona ngokwelatshwa kwemvukuzane eMpilo Central Hospital Radio Therapy Department, uMnu. Mqondisi Ndebele, uthi imikhuhlane yemvukuzane isikhokhela ekubulaleni abantu emhlabeni wonke jikelele ngoba abantu abalalwazi ngayo.
"Umkhuhlane wemvukuzane usuphezulu ekubulaleni abantu ukudlula ufuba, igcikwane lengculaza leminye imikhuhlane imbangela yikuthi abantu abalalwazi, abanye bacabanga ukuba ngamaloyo bacine bephuza ukuzokwelatshwa."
UNdebele uthe zintathu imvukuzane ezibulala abantu ezibalisa eyebele, eyomlomo wesibeletho sabomama kunye lohlasela abesilisa oweprostate cancer.
Wengeze ethi imitshina elohlonzi yokuhlola imvukuzane balayo sibili kodwa eminye kayisebenzi ngemfanelo.
“Inani labantu abahlaselwa yilo umkhuhlane liya likhula ngomnyaka ngomnyaka kumnyaka odlule selaphe abantu abadlula inkulungwane ezimbili njalo lapha uhulumende sewafaka imitshina elohlonzi abantu abaze bazekwelatshwa lobanje omunye wemitshina yethu ufile kodwa abantu sibalayela ukuba bayekwelatshwa esibhedlela sikahulumende eHarare."
UDokotela Solwayo Ngwenya, umqondisi wesibhedlela seMpilo Central Hospital, ukhuthaza abantu ukuba bengesabeli khatshana badinge usizo kusasemasinya.
“Lamhlanje lilanga lokunanza umkhuhlane wemvukuzane, kuqakathekile ukufundisa abantu lobanje inengi lidinga usizo sekukubi bagijimela kubosiyazi kodwa abantu abagijimele esibhedlela."
UDokotela Ngwenya uthi umkhuhlane wemvukuzane uyelapheka uma uthe wabanjwa kusasemasinya.
“Umkhuhlane wemvukuzane ungabanjwa kusasemasinya uyelapheka njalo kuqakathekile ukuhlala abantu behlolwa bengesabeli khatshana."
UDokotela Ngwenya uthe osiyazi abalalwazi kangako ngokwelatshwa kwemvukuzane ngakho uzulu kumele adinge usizo kusasemasinya ezibhedlela.
“Abantu bebogijimela esibhedlela bengazibona beula hatshi ukugijimela kubosiyazi endabeni zokopha, lokuvuvuka ngoba kudingakala ukubonw nodokotela"
Kusenjalo, inyanga kaMfumfu layo yahlelwa ngumhlaba jikelele ukuqakathekisa imikhankaso yokulimukisa uzulu ngomkhuhlane wemvukuzane yebele, iBreast Cancer Awareness Month ngoba usubulele abantu abanengi.
Your browser doesn’t support HTML5
Udaba Esilethulelwe NguAnnastacia Ndlovu