Izisebenzi zikahulumende zithi zifuna ukuhola idola leMelika hatshi imali yohlobo lweBond esetshenziswa elizweni abathi izifanela nje lomquba kumbe ama-bearers cheques asetshenziswa ngesikhathi uMnu. Gideon Gono engusibalukhulu webhanga leReserve Bank of Zimbabwe.
Lokhu ngokunye okuphume emhlanganweni ngoLwesine owenziwe ngezinye izisebenzi zikahulumende labamele umqhatshi okubizwa ngokuthi yiNational Joint Negotiating Council.
UMnu. Gibson Mushangu, isikhulumeli sinhlanganiso yeZimbabwe Confederation of Public Sector Trade Unions eyayisaziwa ngokuthi yiApex Council, uthi kabavumelananga lutho emhlanganweni lo.
“Asizange sizwanane lohulumende, sizazwananana nxa sebeguqule abakufake kutafula yokuxisasana. Okwakhulunywa nguMnu. Mthuli Ncube ukuthi uhulumende uzakhweza imali yikho esikuzwileyo.”
UMushangu uqhubeke esithi bafuna ukuholiswa ngedola leMelika, okuyinto eyaliwa nguhulumende.
Omele inhlanganiso yababalisi yeProgressive Teachers’ Union (PTUZ), uMnu. Takavafira Zhou, uthi kabazange bahambe emhlanganweni lo.
“Kulendaba ezinengi esifuna ukuzitsho. Esifuna ukukutsho yikuthi yonke into esizayikhuluma lohulumende kumele ibe labantu esibathumileyo.”
Umbalisi okunhlanganiso yePTUZ, uNkosikazi Mercy Chingwangwana, uthi bafuna iholo labo lengezwe.
“Imali esiyitholayo incane, iholo lethui esilithoilileyo liphela singakabhadaleli into esizifunayo. Indleko zesikolo zabantwana ziyedlula imali esiziholayo.”
Uhulumende uthi izisebenzi zikhangelelwe ukuba zibe semsebenzini ngezikhathi zonke kungelani lenhlupho ababhekane lazo ezigoqela ezeholo elincane ezikhala ngalo.
Uthi njalo kasoze anikeiholo abantu abangayi emsebenzini ngenxa yeholo.