Sokuqhamuke umkhuhlane wesihudo seCholera eGwanda esabelweni seMatabeleland South. UAlbert Ncube usipha loludaba.
Kuvalwe ngci eCasualty Department eGwanda Hospital.
Ngesikhathi lumsakazo ufika esibhedlela esikhulu seGwanda ngoLwesithathu ekuseni, lapho okufikela khona abaphatheke kakhulu eCasualty Department bekuvaliwe kulogulayo oyedwa okubikwa ebanjwe umkhuhlane wesihudo seCholera.
Izisebenzi zalesisibhedlela bezilungisa itende lapho ogulayo azabe ehlala khona kanye labanye abangabamba lumkhuhlane
Obanjwe lumkhuhlane ngosakhulayo osuka emaphandlleni eZhukwe duzane ledolobho leGwanda njalo kubikwa ebesebenza emitshoveni esuka koBulawayo isiya ekhaya lakibo.
Bazama ukuthanyela kakhulu esibhedlela seGwanda lapho okulomuntu olesihudo seCholera.
Kubikwa ukuthi kazange ayefika eMt. Darwin kumbe eChiredzi lapho lumkhuhlane oqhamuke khona kumaviki asanda kwedlula.
UDokotela omkhulu esiqintini seGwanda, uAndrew Felix Muza, ubikele lumsakazo ukuthi bacabangela ukuthi ogulayo ulomkhuhlane wesihudo seCholera kodwa basazomhlola ngemitshina ukuze babeleqiniso.
“Okwakhathesi silomuntu esicabangela ukuthi angabe eleCholera kodwa sisamhlola njalo impumela sizakuba layo ngemva kwamalanga amabili. Sisathumele isihudo sakhe ukuze sibe leqiniso eligcweleyo.”
Isibhedlela esikhulu seGwanda kasilayo imitshina yokuhlola umkhuhlane wesihudo seCholera njalo lokhu kwenzakala kuphela koBulawayo okulakho ukudala ukumemetheka kwalumkhuhlane lapho kusamelelwe impumela.
Isibhedela seGwanda Provincial Hospital.
UNobhala jikelel wenhlanganiso yezakhamizi zeGwanda, uMnu Bekezela Maduma Fuzwayo, uthi kuyamangalisa ukuthi lesisibhedlela kasilayo imitshina yokuhlola iCholera.
“Kuyasethusa lokhu ngoba iCholera ngendlela esizwa ngayo umuntu iyamthatha within 24hrs or 12hrs, so nxa amatests ezathatha 48 hrs ukuthi ahambe aze abuye ngesikhathi amaresults layo ebuya ayathola umuntu sefile. Kuyasimangalisa ngoba kulemali enengi kakhulu eyadonethwa ngabantu leyinye eyafakwa nguhulumende ukwenzela ukunqabela iCholera. Ngakho-ke yindaba bengela mitshia efaneleyo.”
Isibhedlela seGwanda Provincial Hospital lapho osokuqhamuke umkhuhlane wesihudo seCholera.
Umkhuhlane wesihudo seCholera uqhamuke eHarare kunyanga ezintathu ezedlulileyo lapho owabulala abantu abafika phose amatshumi amahlanu ngemva kokuthi uqhamuke njalo okwesibili kunyanga eyedlulielyo eMt Darwin.
Ukuqhamuka komkhuhlane wesihudo lo edolobheni leGwanda kulakho ukuphazamisa amalungiselelo omhlangano weZanu PF okhangelelwe ukuqala Esigodini kuviki ezayo njalo ezinye iziphathamandla labalandeli bebandla leli bazabe behlala kulelidolobho okungadala ukumemetheka kwalesisihudo.
Kusenjalo, uzulu usekhuthazwe ukuba ahlale endaweni ehlanzekileyo ukuze enqabele ukumemetheka kwemikhuhlane.
Ekhuluma lapho kusungulwa uhlelo lweNational Clean Up Campaign unobhala kamanisipala weGwanda, uMnu Hlupho Mhlanga, ukhuthaze uzulu ukuthi agcine indawo yakhe inhlanzekile.
UMongameli Emmerson Mnangagwa kumbiko ayethule lapho kusungulwa loluhlelo uveze ukudana ngenani labantu ababulewe ngumkhuhlane wesihudo seCholera lonyaka esithi akusamelanga lumkhuhlane uqhubekele phambili ubulala abantu.
Your browser doesn’t support HTML5
Kulomuntu Ocatshangelwa Ukuthi Ulomkhuhlane Wesihudo seCholera