Amalunga enhlanganiso ezilwela amalungelo abesifazane, ahlangene eHarare ngoLwesine, ehlaziya osekuthe kwenziwa eminyakeni engamatshumi edluleyo ngokwavunyelanwa emhlanganweni wabesifazana emhlabeni jikelele owe Beijing oka 1995, lapho amazwe aphuma lezinqumo ezimbalwa ngaphansi kogwalo olwe Beijing Platform of Action.
Lumhlangano wenziwa phansi kwamalungiselelo okuyangena umhlangano omkhulu wabesifazana emhlabeni jikelele ngenyanga ezayo, owenzelwa eNew York kwele Melika lapho inkokheli zamazwe womhlaba ezizakwethula esezikwenzile njengabohulumende ukufeza okwavunyelanwa ngomnyaka ka 1995.
Lezi nhlanganiso ziyavuma ukuba lanxa zingasafezwanga ngokugcweleyo izibopho ezenziwa emhlanganweni we Beijing ngomnyaka ka 1995,ukhona umahluko kwezemithetho eminengi eseyaguqulwa emazeni ehlukeneyo womhlaba ephathelane labesifazana.
Ziveza njalo ukuba lanxa lokhe lisalele muva eleZimbabwe kudaba lokulandela ngokugcweleyo okumunyethwe yilolu gwalo, sekwedlule iminyaka engamatshumi amabili selokhu umhlangano weBeijing wenziwa kukhona osokwenziwe.
Umgcinisihlalo wenhlanganiso yomanyano wenhlanganiso ezilwela amalungelo abesifazane owe Women’s Coalition of Zimbabwe uNkosikazi Virginia Muwanigwa uthi kulutshwana osokwafezwa nguhulumende wakuleli nxa kukhangelwa okwavunyelanwa emhlanganweni eBeijing. Ethi lokhu kubangelwa yizizatho ezimbalwa ezibalisa ukungazinikeli kukahulumende ukuqhuba inhlelo ezisekela izibopho zogwalo lwe Beijing Platform for Action.
Unkosikazi Rejoice Timire ngumqondisi wenhlanganiso emela abesifazane abaphila lobugoga eye Disabled Women Support Organisation. Unkosikazi Timire obe khona kulumhlangano uthi lanxa kukhulunywa ngezamalungelo abesifazane, bona babhekane lenkinga eziphethwe kabili ngoba bephila lobugoga njalo bebandlululwa ukwedlula abanye.
Uthi kunje lalowo mbiko ozayakwethulwa nguhulumende weZimbabwe emhlanganweni we Beijin +20 Platform Review phezu kosekuthe kwenziwa nguhulumende ukufeza izibopho zomhlangano weChina ngomnyaka ka 1995, ungaphathi inking zabaphila lobugoga obutshiyeneyo.
Lanxa kwavunyelanwa emhlanganweni weBeijing ukuba ohulumende bathuthukise abesifazane kwezenotho, uTimire uthi kakunjalo kulabo abaphila lobugoga ngoba uhulumende evele ebakhohlwa sikhathi sonke.
Enye yenhloso yalomhlangano oqoqwe zinhlanganiso ezibalisa umanyano weZimbabwe Women Lawyers Association ( ZWLA ) kanye leye Women Coalition in Zimbabwe ( WoCoZ ) bekuyikubonisana phezu kkokuqoqwe nguhulumende weZimbabwe azayakwethula emhlanganweni weNew York ngenyanga ezayo owe Beijing Platform for Action Report.
Umhlangano weNew York uzakwenzelwa esigodlweni senhlanganiso yomanyano wamazwe womhlaba ese United Nations kusukela mhla ka 9 kusiya kumhla ka 20 ngenyanga ezayo kaMbimbitho.
Abazangena lumhlangano bakhangelelwe ukuhlaziya izibopho zeBeijing Declaration and Platform for Action okubalisa ubunzima obukhona lemigoqo evimba ukuthi zingalandelwa kanye lokufezeka kokulinganiswa kwamathuba phakathi kwabesifazane labesilisa.
Kuzathathwa lelithuba emhlanganweni lo ukukhangela ukuba zifezeke kanjani lezo zivumelwano ezenziwa ze Beijing Declaration and Platform for Action, njengoba isingamatshumi amabili iminyaka selokhu zenziwa emhlanganweni wakwele China ngomnyaka ka 1995.
Your browser doesn’t support HTML5
Udaba Esilwethulelwe NguMavis Gama