Umhlangano wenkokheli zezwekazi leAfrica lezeMelika uqalise lamuhla eWashington D-C kulabanye abantu abakhonona ngokuthi akukhanyi ukuthi inkokheli yeAfrica izadonsa ndawonye ukwenzela ukuthola uncedo lwemali lokunye okutshiyeneyo kokuthuthukisa izwekazi leAfrica.
Ingcwethi kwezenotho lezombusazwe zithi ukutshiywa kukaMongameli Robert Mugabe emhlanganweni lo kukhanya kulakho ukubisela muva ukuguqula umnotho eZimbabwe.
Inkokheli yezwekazi leAfrica engamatshumi amahlanu – 50 – isiqalisile ukwenza imihlangano etshiyenayo lenkokheli yeMelika.
Kukhangelelwe ukuthi umhlangano lo uzakhuthaza ukuthuthukisa abasakhulayo njalo lokukhuphula ubudlelwano beMelika lamazwe wezwekazi leAfrica.
Ingcwethi kwezombusazwe zithi kumnyama phambili njengoba kungakhanyi ukuthi izethekeli zezwekazi leAfrica zimumetheni.
Umnu. Nkosilathi Khanye ingcwethi kwezombusazwe ngomunye walabo abathi inkokheli yeAfrica ibuye ingazimisilenga ukuthola uncedo lwalokho okuhlasele wonke amazwe.
Uthi uMongameli Barack Obama ohlangana lenkokheli yezwekazi leAfrica uzama ukunceda ukuthi amazwe amanengi athuthuke.
UKhanye uthi akumangalisi ukuthi uMugabe kabizwanga emhlanganweni lo.
Umnu. Bhekinkululeko Ndlovu isakhamuzi selokitshini leCowdray Park koBulawayo njalo oyingcwethi kwezentuthuko ugcizelele esithi ukungabizwa kukaMugabe kubisela ilizwe emuva
Uthi amanye amazwe alakho ukuthola uncedo olumangalisayo eMelika njalo uncedo oluvela emazweni atshiyeneyo luyatshaphazwa kwele Zimbabwe.
Umnu.Rugare Gumbo isikhulumeli sebandla leZanu PF kavumelani laye. Uthi umhlangano lo ngowokuchitha isizungu kuphela.
Ilizwe leMelika lafakela iZimbabwe izijeziso zenotho lisithi uMongameli Mugabe labanye bakhe kubandla leZanu PF babekhahlameza uzulu njalo bengahambisi kahle ukhetho.
Kulamazwe engamatshumi amabili – 20 – athengisela eleMelika impahla ezibiza amabillion afika amatshumi amabili leSikhombisa – $27 billion – ngomnyaka engabhadali umthelo wemingcele owe customs duty
Impahla le ithengiswa ngaphansi komthetho weMelika obizwa ngokuthi yiAfrican Growth and Opportunity Act owabunjelwa ukuthuthukisa umnotho wezwekazi leAfrica.
Uzulu umelele ukubona ukuthi kuzaphumani emhlanganweni lo ongowokuqala ukwenziwa ngumongameli weMelika lenkokheli yezwekazi leAfrica.
Abekade besemhlanganweni etshiyeneyo ngoMvulo bagoqela uMnu. John Kerry unobhala jikelele welizwe leMelika, Unkosikazi Samantha Power omele iMelika eUnited Nations loNkozikazi Ayanda Dlodlo umsekele womphathintambo wezisebenzi zikahulumende.
Abanye njalo abakhulume emhlanganweni wenhlanganiso ezizimele zodwa, nguMnu. Rakesh Rajani, owaziwa kakhulu kwele Tanzania ngokulwela ilungelo loluntu loMnu. George Chiponda omele ezobudlelwano lamanye amazwe kwele Malawi.
UKerry utshele umphakathi ukuthi kumele inkhokheli kuzwekazi leAfrica ilwisana lobusela obenziwa yiziphathamandla zikahulumende kanye lokulungisela uzulu okuzamthuthukisa.