Abanye abaqondisi bamankampani lengcwethi kwezomnotho bathi uhulumende kaMongameli Emmerson Mnangagwa nguye owenza ukuthi kukhuphuke intengo yempahla njalo kuwe isisindo sohlobo lwemali yebond notes.
Lokhu kuphume kungxoxo mpikiswano izolo kusihlwa elesihloko esithi ‘Pricing Madness’ eyethulwe kumabonakude weZimpapers TV Network ebibambisana lomsakazo weVoice of America.
Abakade bekhuluma bagoqela uMnu. Nqobizitha Ndlovu, umphathintambo wezamafekithali, umqondisi weDairibord uMnu. Antony Mandiwanza, ingcwethi ezimele yodwa uMnu. Brains Muchemwa, usomabhizimusi uMnu. Shingi Munyeza, umqondisi wenhlanganiso yeConfederation of Zimbabwe Retailers uMnu. Denford Mutashu labanye.
UMandiwanza uthe akuqedakali okwenziwa nguhulumende osanda kubika ukuthi imali yohlobo lwebond iyalingana lemali yeMelika yena esanda kwethula ukuthi sokumele kuvulwe ingwalo zamabhanga zokwehlukanisa imali le.
“Ukuxokozela okukhona kulez’insuku kwezemali lezokuthengiselana kutshengisela ukuthi osomabhizimusi kabathembi okwethulwa lilizwe. Sicela ukuthi utshele uzulu ukuba kambe imali yohlobo lwama bond notes ledola leMelika kuyalingana yini.”
Ubala imali yohlobo lwama bond notes. (C.Mavhunga/VOA)
Lokhu kugcizelelwe nguMnu. Muchemwa othi uhulumende nguye owenza ukuthi kukhuphuke intengo yempahla okungapheliyo njalo lokuthi kuswelakale impahla ezitolo.
“Engikukhulumayo yikuthi elizweni leZimbabwe lapho okuzunguzeka khona isisindo semali mahlayana lokunye okufanayo, kumele kube lemithetho eqondileyo hatshi ukuthi lamuhla kukhulunywa lokhu kusasa lokhuyana. Kuzwisa ubuhlungu ukuthi okwenzakala khonamanje kwenziwa nguhulumende. Kuyamangalisa ukuthi umphathintambo wezemali okhangelelwe ukuthi kumele avikele umnotho lelizwe yena wenza okungaqondanga. Yikho lokhu okwenza ukuthi kubelokuxokozela konke lokhu elizweni.”
UNdlovu utshele ababili laba labanye akade bekugxoxo mpikiswano le ukuthi umphathintambo wezemali, uMnu. Mthuli Ncube, usebenza gadalala lezinye iziphathamandla zikahulumende ukuthi kuthuthukiswe umnotho welizwe ngemfanelo.
“Akumelanga silahleke kusiqokoqela sethu sokuthuthukisa ilizwe leZimbabwe ngenxa yokwenzakala khonamanje. Osanda kukhuluma ukhulume ngokuthi aziqedakali inhlalo esizenzayo. Bengifisa ukuthi nga uyelula kulokhu. Kungasenani, uhulumende wenza kahle ngokwethula imithetho yokuthuthukisa ilizwe. Engingakutsho njalo yikuthi isisindo semali yohlobo lwe bond ledola leMelika siyalingana. Lokhu kugoqela leRTGS. Konke lokhu akumelanga kuqambule esizakwenza.”
Bakhale njalo langomthetho omutsha okumele ubhadalwe nguzulu lamankampani nxa kuthunyezwa imali kumakhalekhukhwini. UNdlovu uthe umthelo lo wenzelwa ukuthi kuthuthukiswe umnotho welizwe.
Your browser doesn’t support HTML5
Udaba Esilethulelwe NguGibbs Dube