Uguquka komumo womkhathi okubizwa ngokuthi yi-climate change kanye lenhlupho ezilethwa yikufiphala kweyezi le El Nino ephehlwa elwandle lwe Pacific Ocean sokusethusa uzulu lababusayo emazweni atshiyeneyo.
Ukuguquka komkhathi okubangelwa ngokufana le El Nino kukhangelelwe ukuletha indlala emangalisayo lengozi yezulu lesikhukhula emazweni anjenge Zimbabwe lamanye awezwekazi le Africa.
Umbiko owethulwe izolo ntambama yinhlanganiso ebona ngezikhalazo zabantwana iUNICEF uthi kukhangelelwe ukuthi abantwana abayizigidi ezilitshumi lanye – 11 million - kuzwekazi leAfrica bazabhekana lendlala emangalisayo ngenxa yokuguquka komumo womkhathi.
Kulokuphikisana okumangalisayo ngokuguquka komumo womkhathi kwamanye amazwe anjenge Melika lapho abanye abakudale leCongress abathi ukuguquka lokhu yikwenza kwezemvelo hatshi ukuthi kwenziwa nguzulu lamafekithali.
Amazwe atshiyeneyo azama ngawo wonke amandla engaphansi kwenhlanganiso ebizwa ngokuthi yi Conference of Parties ezama ukuthi kumiswe ukutshisa amalahle kumafekithali, kuphungulwe njalo intuthu ephuma ezimoteni lokunye okwenza ukuthi kuguquke umumo womkhathi.
IConference of Parties izakwenza umhlangano omkhulu ngoMpalakazi eParis, France, lapho ezabe ihlolisisa okwenzakala emkhathini. Kambe uzulu eZimbabwe wazini ngokuguquko komkhathi lalokhu okubizwa ngokuthi yi El Nino eletha indlala?
Ukuze sihlaziye udaba lolu, sixhume uMnu. Vumani Ndlovu okunhlanganiso yeRural Communities Empowerment Trust loNkosazana Mpokiseng Sibanda ongukhansila eNkayi.
UMaSibanda uthe abantu abanengi emaphandleni kabakwazi ukuthi ukuguquka kwesimo somkhathi ikakhulu okwenziwa yi El Nino kubanjwa njani.
Uthe uzulu ukhala ngendlala langokulahlekelwa yizifuyo ezibulawa yikuzwelakala kwemadlela lokudla.
Lokhu kusekelwe nguNdlovu othe okudanisa uzulu yikuthi uhulumende kancedi abantu makhaza ngokuveza ukuthi kwenzakalani emkhathini.
Your browser doesn’t support HTML5
Ingxoxo Esiyenze LoNkosazana Mpokiseng Sibanda LoMnu. Vumani Ndlovu