Ibandla leZanu PF lithi lizaqhubeka lisenza konke okusemandleni alo ukubona ukuthi ukhetho oluzayo aluladlakela.
Lokhu kwethulwe yisiphathamandla seZANU PF, uMnu. Paul Mangwana, ngesikhathi sengxoxompikiswano yokhetho eqhutshelwe eJohannesburg ngoLwesithathu ntambama.
Ekhuluma embuthanweni wengxoxompikiswano yezokhetho phakathi kweMDC-T Alliance leZANU PF, uMangwana uthe ibandla lakhe sekulibandla elehlukileyo kulakudala ngoba seliphansi kobukhokheli obutsha lomongameli omutsha.
“Ibandla laZANU PF lizimisele phansi komkhokheli walo omutsha ukuqeda udlakela lwezombusazwe. Okwenzakele ngeviki ephelileyo bekungacina kuphetha ngokuchitheka kwegazi. Siphose salahlekelwa zinkokheli zethu zonke ekudubukeni kwaleliya bhomba kodwa indlela umongameli wethu aphathe ngalo lesisehlakalo lami bengingangeke ngikwenze.”
Bahlaziya okwenzakala kwele Zimbabwe.
UMangwana uthe loba kwathatha isikhathi eside ukukhipha umnumnzana Robert Mugabe esihlalweni, iqiniso yikuthi ibandla lakhe yilo lodwa eZimbabwe eselanelise ukukhipha umkokheli walo esikhundleni esaphila, okuyinto esiyehlule amabandla aphikisayo.
Uthi okwamanje uMongameli Emmerson Mnangagwa usekubeke kwacaca ukuthi uzabusa iminyaka elitshumi kuphela nxa ekhethiwe njengokutsho kwesisekelo sombuso.
Uthi ibandla lakhe liyaziqhenya njalo ukuthi lenelisile ukufaka abesifazana abanengi ezikhundleni zobukhokheli.
Enkulumeni yakhe, isiphathamandla sebandla le MDCT-Alliance uMnu. Douglas Mwonzora uthi ibandla lakhe lilamacebo amakhulu okuthuthukisa iZimbabwe nxa linganqoba ekhethweni oluzayo.
“Sifuna ukwakha ilizwe. Silondoloze isizotha senkokheli zomdabu. Ziqinisekise njalo ukungasekeli hlangothi kwebutho, inhloli labapholisa ukuze besebenze ngendlela ehloniphekayo. Sifuna njalo ukukhangela ezokuxhumana kweZimbabwe lamanye amazwe.”
Uthi bafuna ukwethula intuthuko yezomnotho ezofinyelela umuntu wonke weZimbabwe. Phansi kukahulumende webandla lakhe uthi abantu bonke bazathola amathuba afanayo benelise njalo ukudla ifa lelizwe labo.”
OkaMwonzora uthi bafuna uzulu kube nguye othatha izinqumo kulokho okwenziwa nguhulumende, kanti njalo uthi bazaqeda inkohlakalo baphucule inhlalo kazulu ngendlela engazange ibonakale.
Your browser doesn’t support HTML5
Udaba Esilethulelwe NguBenedict Nhlapho