Idale leSupreme Court lithi alulamkantsho udaba oluphanyekwe nguMongameli Donald Trump emthethwandaba lo lapho azama ukuguqula impumela yokhetho lukamongameli ePennyslvania anqotshwe khona nguMnu. Joseph Biden webandla lama Democrats.
Idale leli ngoLwesibili lethule isinqumo sokuthi alucaci udaba oluphanyekwe nguMnu. Mike Kelly, odlelana loTrump, olokuthi kumele kulahlwe amavoti edlula izigidi ezimbili lengxenye – 2.5 million esabelweni lesi enziwa ngeposo.
UKelly labanye bakhe bathi ukuvota kusetshenziswa iposo, okukhanya kusenziwa kakhulu ngabakubandla lama Democrats, kwenza ukuba ukhetho lungaqhutshwa ngemfanelo. Kodwa amahluli beadle leSupreme Court abavumelani lakho lokhu.
UTrump usezame ukuvimba ukunqoba kuka Biden ezabelweni ezinengi ngokusebenzisa imithethwandaba kodwa kukhanya kusehlula. Okwamanje, isabelo seTexas sesiphanyeka olunye njalo udaba eSupreme Court lapho oluzama ukuvimba impumela yokhetho ePennyslvania, Wisconsin, Michigan, Arizona, Georgia lezinye okwanqoba uBiden.
Bakhala ngokuvuta kusetshenziswa iposo. Izabelo ezinengi izolo zigqibe uhlelo lokukhetha abazavotela umongameli ababizwa ngokuthi ngama electors. Amagqwetha kaTrump athi azatshukana loBiden kuze kuyefika edale leCongress.
UNkosikazi Priscilla Ndlovu, olandela ezombangazwe, uthi uTrump akulandlela anganqoba ngayo uBiden.
UMnu. Busani Mbuso Ntini laye olandela ezombusazwe uthi uTrump kukhanya esephelelwe ngumphako.
Kukhangelelwe ukuthi ngeviki ezayo mhlaka 14 abakhetha umongameli bazavota ezabelweni zabo kuthi lokhu abakwenzileyo kuhanjiwe edale leCongress.
Kudale leli, kubikwa ukuba abakubandla lama Republicans kukhanya bezimisele ukuphikisa impumela yokhetho lolu. Kungehlula ukuthi kuguqulwe impumela yokhetho lolu, uBiden uzagcotshwa ukuba ngumongameli mhlaka 20 ngoZibandlela.
Your browser doesn’t support HTML5
Umthethwandaba Ulahla Udaba Oluphanyekwe NguTrump Ofuna Kuguqulwe Impumela Yokhetho