Abalandeli bebandla leZanu PF abaxotshwa labamiswa kancane ukuba ngamalunga ngaphambilini komhlangano wokukhetha inkokheli ngoMpalakazi nyakenye bathi uMongameli Robert Mugabe uyazikhulumela nje nxa esithi akumelenga indaba zebandla leli zihlafunwe emthethwandaba.
Omunye walabo abaxotshwa kubelandla leli, uMnu. Rugare Gumbo, utshele iStudio 7 ukuthi uphosisile uMugabe otshele idale lePolitburo izolo ukuthi akuladaba lweZanu PF okumele luphathwe ngamadale emthethwandaba.
UGumbo uthi labo abakhahlamezwa yinkokheli yeZanu PF eyazifaka ezikhundleni ngomhlangano weCongress nyakenye abagoqela owayengumsekeli kamongameli, uNkosikazi Joice Mujuru, sebelungisela ukufaka udaba lwabo emthethwandaba.
Uthi okukhulunywe nguMugabe akula mbono ojulileyo njengoba zonke indaba ezikhathaza uzulu zilakho ukuhanjiswa emthethwandaba.
Owayebona ngenhlelo zebandla leZanu PF nsukuzonke, uMnu. Didymus Mutasa, usanda kubika ukuthi bonke labo abahlukuluzwa ngesikhathi seCongress sebedinge amagqwetha azahambisa udaba lolu emthethwandaba.
Kasenelisanga ukukhuluma ngodaba lolu lesikhulumeli sebandla leli, uMnu. Simon Khaya Moyo, okade engaphenduli umakhalekhukhwini wakhe.
UMutasa uthi ufisa ukuthi idale lomthethwandaba lichithize konke okwenziwa kulowomhlangano weCongress nyakenye esithi kwenziwa okungekho emthethweni.
UGumbo uthi banengi abasekeli bebandla leZanu PF abatshelela uMugabe eceleni ngokwenzakala kubandla leli lelizweni.
Your browser doesn’t support HTML5
Ingxoxo Esiyenze LoMnu. Rugare Gumbo