Ibandla leMthwakazi Republic Party (MRP) labanye abantu eMatabeleland basola uhulumende owakhe ingcwaba lesotsha elingaziwayo eBhalagwe okwaphoselwa khona abantu emigodini yeBhalagwe esiqintini seKezi.
Bathi uhulumende uphinde wavala umbhalo obuveza ukuthi indawo leyo yalahlelwa abantu abanengi abanye babo ababephoselwa bephila libutho leGukurahundi elalolongwa lilizwe leNorth Korea.
UMongameli weMRP, uMnu. Mqondisi Moyo, uthi bagangile abenze lokhu.
“Izolo emini besiye eBhalagwe sathola ukuba sekulokuganga okwenziwe nguhulumende wakuleli owakhe iTomb of the Unkown Soldier. Akudingakali iTomb of the Unknown, kufuneka ingcwaba leGukurahundi Victim ngoba abantu laba babebulawa babengekho empini.”
UMoyo uthi okunye okubakhathazayo yikuvalwa ngesamande kwamabala athi Mass Grave eBhalagwe emathuneni amabili.
“Okunye esikutholileyo yikuthi amangcwaba amabili abhalwa Mass Grave kudala abesevalwe ngesamende kodwa esikwenzileyo yikuxexebula elinye lamangcwaba isamende abakade sebesifakile bevala amabala athi Mass Grave.”
Okulothwe emathuneni eBhalagwe ...
Umgcinisihlalo weZAPU eMatabeleland South, uMnu. Mathew Sibanda, uthi le yimizamo kahulumende yokufihla ubufakazi bokuthi kulabantu ababulawa ngesikhathi sombhuqazwe weGukurahundi.
“Silokudana okukhulu ngesenzo sebandla elibusayo sokuzama ngamandla abo onke ukuvala ubufakazi bokubulawa kwabantu bengahlomanga ngesikhathi sombhuqazwe weGukurahundi njalo lokhu kulihlazo.”
Isakhamuzi seBhalagwe uMnu. Nxebalendoda Sibanda uthi okwenzakala lapha yikudelela.
“Ngendlela abenze ngayo kutshengisa ukudelela. Isenzo abasenzileyo sikhombisa ukuba kukhona abakudingayo, bazama ukuvala ubufakazi ubusobala bokubulawa kwabantu mahlayana.”
lsakhamuzi sakoBulawayo, uMnu James Hlangabana, uthi okwenziwa nguhulumende yikuganga.
“Lokhu kuyisibonelo sokuganga esikhulu sikahulumende omutsha abahlala bekhuluma ngokubambana kodwa bedhoda ngale bezama ukuvala ubufakazi bombhuqazwe weGukurahundi, njalo yikusidelela okuphezulu kodwa ngelinye ilanga kuzasixabanisa.”
Ucaningo olwengizwa yinhlanganiso yeLegal Resources Foundation leye Catholic Commission for Justice and Peace ngomnyaka ka1997 kwaveza ukuba ibutho leGukurahundi labulala abantu abafika inkulungwane ezingamatshumi amabili – 20,000 eMatabeleland leNkabazwe kusukela ngomnyaka ka1982 kusiyafika umnyaka ka1987.
Your browser doesn’t support HTML5
IMthwakazi Republic Party Izonde Igan'unwabu Ngokwenzakala eBhalagwe