Umthethwandaba uthi akumelanga ibandla leMovement for Democratic Change elikhokhelwa ngoNkosazana Thokozani Khupe lidinge amalunga amatsha ephalamende kulandela ukuxotshisa kwalo edale leHouse of Assembly lele Senate abane abadlelana lomanyano weMDC Alliance okhokhelwa nguMnu. Nelson Chamisa.
UJustice Joseph Mafurise wenze isinqumo lesi namuhla eHarare.
Udaba lolu luphanyekwe eHigh Court nguNkosazana Thabitha Khumalo loNkosikazi Lilian Timveous abaxotshiswa libandla leMDC-T edale lephalamende.
Abanye abaxotshiswa libandla leli nguMnu. Charlton Hwende loMnu. Prosper Mutseyami
UMnu. Charles Kwaramba, igqwetha lika MaKhulalo loTimveos, uthi umthethwandaba umise uMaKhupe labanye bakhe ukuba bengenzi santando kumalunga edale lephalamende akumanyano weMDC Alliance.
“Loludaba luzwiwe kuviki ephelileyo. Osekwenzakele yikuba idale lethule isinqumo phezu kwaloludaba. Umthethwandaba uphe izinqumo sokumisa iqembu labo Douglass Mwonzora kanye loKhuphe ukubeka amalunga abo endaweni yalawo abawasuse ezikhundleni ababalisa u Khumalo lo Timveos. Yikho okwenzakeleyo.”
UDokotela Nkululeko Sibanda, isikhulumeli sika Chamisa, uthi besivele singekho isizatho sokuthi uMaKhuphe labanye bakhe bathathe lelonyathelo.
“Amalunge eMDC Alliance ngamalunga eMDC Alliance. Kuvele bekungafanelanga ukuthi kufike kuleso sibanga. Siyazi ukuthi laba abazama ukuhlukumeza uPresident Nelson Chamisa ngoba befuna ukuthi bamhlukumeze nje kuphela bazama ukuthi bethusele abalandeli bakhe ukwenzela ukuthi bangabi lokhu bemsekela njalo behambisana laye.”
Isikhulumeli sebandla leMDC-T, uMnu. Douglas Mwonzora, utshele intathelizindaba kunsukwana ezisanda kwedlula ukuba balawo amandla okwenza lokho njengoba kuyibo inkokheli uqobo ebandleni leMDC elalikhokhelwa ngumuyi uMorgan Richard Tsvangirai.
“Phakathi kwabayi 111 silamandla phezu kwabayi 103, kumalunga edale lephalamende. Kasilawo amandla phezu kwalabo kwamalunga awePDP, oTendai Biti, uMadzimure labanye babo, kasilawo amandla kulabo. Kasilawo njalo amandla kumalunga edale lephalamende awebandla leMDC elikhokhelwa nguWelshman Ncube. ”
Ingcwethi kwezombusazwe lenhlalakahle kazulu, uMnu. Mlindelwa Mancitshana, uthi ukudonselana lokhu sokuphambanisa ukusebenza kwamalunga asedale.
“Nanku phela bafuna ukudla, bafuna ukuphilisa izimuli. So, sokutshengisa sobala ukuthi hayi, abantu bayabe sebekhangela imisebenzi yabo kuqala kulalokho abathi bona bayafuna ukukwenza, ukulwela abantu babo. So, khathesi kuzabangela ukuthi olakho alakho empilweni uyakwanisa ukuthatha inyathelo. Lo onguye okhangelele ukuphila ezuza imali ngokuba nguMP sizabona futhi ethatha icele lokubuyela ephalamende esephikisana lalokho obekufunwa libandla lakhe.”
Esinye isiphathamandla seMDC-T, uMnu. Nixon Nyikadzino, uthi lokho osekusenzakala ayisikho okukhangelwe nguzulu.
“Thina njenge MDC eyafonywa mhlaka 21 April 2018 eStanely Square koBulawayo sithi lokho vele akulunganga. Uhulumende vele ma efuna imultiparty democracy kufanele ukuthi ayekele amanye amabandla ukuthi beyenze izinto zabo. ”
Amacele womabili alwisana kulandela isinqumo somthethwandaba weSupremer Court owathatha isinqumo esokuthi uChamisa kathethwanga ngemfanelo ngakho-ke akumelanga akhokhele ibandla leMDC.
Your browser doesn’t support HTML5
Udaba Esilethulwe NguMavis Gama