Umkhokheli webandla leMDC-T, uNkosazana Thokozani Khupe, otshaywa ngabacatshangelwa ukuthi ngabalandeli baka Mnu. Douglas Mwonzora ngeSonto kusihlwa eHarare, uthi usevalise umhlangano oweExtraordinary Congress njalo wasusa uMwonzora okwesikhatshana esikhundleni sika nobhala jikelele.
UMaKhupe, otshaywe ngempama ephuma emhlanganweni owenzelwe eHarare International Conference Center kulandela ukukhonona kwakhe ngedlela ukhetho oluqhutshwa ngayo nguMwonzora, uthi impumela yokhetho lolu kayisoze ivunywe ngoba aluqhutshwanga ngemfanelo.
Wethule umbiko oveze ukuthukuthela kwakhe esithi uMwonzora ubeqhuba ukhetho olungaqondakaliyo njalo ulecala lokuqambula imali yebandla leli.
Isikhulumeli sika MaKhupe, uMnu. Khaliphani Pugeni, uthe uMaKhupe ulelungelo lokumisa imihlangano enje nxa kulomonakalo oveza ukuba ibandla lingangene enkingeni.
Kodwa uMwonzora utshele intathelizindaba eHarare ukuthi uMaKhupe kalamandla okumisa umhlangano oweExtraordinary Congress obuqhutshwelwa eHarare.
Uthi kuyamangalisa ukuthi uMaKhupe obencintisana laye usesithi usemise umsebenzi.
“Lokhu akusebenzi ngoba bengincintisana laye. Ngakho-ke uyangimisa njani umsebenzi yena encintisana lami labanye.”
Abanye abancintisa kukhetho lolu nguMnu. Elias Mudzuri loMnu. Morgen Komochi.
UMwonzora kuthiwa wathatha izigidi phose ezilitshumi zamadola ZWL$9.5 million obekumele isetshenziswe uhuhlawulela abagada amabhasi lokudla emhlangaweni oweExtraordinary Congress.
Umhlangano weExtraordinary Congress wenziwe kulandela isinqumo sedale laphezulu eleSupreme Court elathi kumele kwenziwe umhlangano wokudinga ozangena esikhundleni sika muyi uMorgan Tsvangirai, owabhubha ngomnyaka ka2018.
Idale leSupreme Court lathi uMnu. Nelson Chamisa, okhokhela ibandla leMDC Alliance, akumelanga kube nguye okhokhela eleMDC-T.