Abantwana abanengi okumangalisayo sebehlala emigwaqweni emadolobheni ngenxa yesimo esibi somnotho eZimbabwe.
Lokhu kwenzekala ngesikhathi umnotho welizwe leZimbabwe ugugudeka nsuku zonke.
Ingcwethi ezibona ngenhlalakahle kazulu zithi nxa loludubo lungasathathelwanga amanyathelo ngokuphangisa lungafika esibangeni esibi kakhulu.
UMnu. Albert Mazula, umgcinisihlalo wenhlanganiso emela amalungelo ezakhamizi zeHarare eye Harare Residents’ Trust, uthi lolu ludubo olwavela kude njalo olulokhe lunzima ukulwesula ikakhulu ngesikhathi ilizwe libhekane lomnotho ogugudekayo.
“Lolu dubo ludubo esibe lalo okwesikhathi eside. Sithola uzibuse kwakungela umntwana okuthiwa yi-street kid. Kodwa ngokoma kwezinto kwaqala abantwana okuthiwa ngama street kids. Kanengi kubangelwa yikuthi endlini imuli iyabe ingahlalanga kuhle. Abantwana bacina bengena emigwaqweni.
“Lokhu kwenzakala ikakhulu emadolobheni. Okwamanje kubangelwa yikuthi ezindlini ezinengi abahleli kizo akuhlaleki abantu abalayo imali eyenela ukuthi bakhathalele imuli zabo kahle. So, abantwana bacina besiya ezitaladeni besiba ngama street kids.”
UNkosikazi Priscila Misihairambwi Mushonga, olilunga ledale le phalamende njalo odume ngokulwela amalungelo amantombazana labesifazana, uthi ukuqonga kwenani labantwana emigwaqweni kuveza ukuthi sibi isimo somnotho eZimbabwe.
“Abazali bengabhubha abanye abantwana yibo abacina bezinhloko zemuli okuthiwa ngama child-headed families. Nxa ngikhuluma kanenginengi labanye abantwana laba abathengisa amacansi udubo lwabo olukhulu yikuthi asikho ukuthi udinga imali yokuthi azipende umlomo kumbe alungise ikhanda, udinga imali eyokuthi agcine lokho okuncane akutshiyelwe khona ngoba yena nguye osongumama osongu baba.”
Umbono lo usekelwe nguMazula ogcizelela esithi isimo esibi somnotho yiso esibasela uhlupho lolu.
“Khathesi singakhangela sibona ukuthi izinto lokhe ziqubekela phambili zisiba nzima kakhulu. Insuku eziphelileyo kwaba lokukhwela kwentengo yamafutha, ukukhwela kwamafutha kuzakutsho ukuthi impilo izaba nzima kakhulu kuzakhamuzi zemadolobheni.
“Akumangalisi ukuthi udubo lwama street kids lolu luzakwanda kulokuthi lwehle. Uhulumende useke wazama ukuthi abakhiphe kwehlula kwesinye isikhathi baba gole babahambise kwezinye indawo kodwa uzabona ukuthi bazabaleka bephenduke.”
Inhlolisiso esithe yenziwa iveza ukuba abantwana abaphila emigwaqweni eZimbabwe baphezu kwenkulungwane ezine – 4,000 abagoqela abangabafana lamantombazana.
Uhulumende wasayina isivumelwano seziqondiso zendlela zokulondolozwa kwamalungelo abantwana ngomnyaka ka 1998 phansi kwenhlanganiso yomanyano wamazwe womhlaba eseUnited Nations Convention on the Rights of the Child lese African Charter on the Rights of and Welfare of the Child.
Incitshi ezibona ngenhlalakahle yabantu zicebisa ukuthi abantwana abaphila emigwaqweni kumele bondliwe zimuli, izihlobo, bagcinwe langumphakathi kumbe bafakwe emizini yenhlanganiso ezimele ukugcina abantwana kumbe njalo banikezwe kwezinye imuli ezingabagcina kungela buhlobo ebizwa ngokuthi yi-adoption.
Your browser doesn’t support HTML5
Udaba Esilwethulelwe nguMark Peter Nthambe