Abantu abaphethe amaphepha aweSpecial Zimbabweans Exemption Permit bathi kabakaqali ukulungisa amanye azabavumela ukuba behlale njalo besebenze kwele South Africa,
Abawaphethe okwamanje azavalwa nguhulumende ngoMpalakazi ngomnyaka ka2022.
Kulabantu abafika phose inkulungwane ezingamatshumi amabili – 178,000 okumele bedinge amaphepha amatsha azabenza behlale kwele South Africa kulandela okusanda kwethulwa nguhulumende othi kasoze aqhubekele phambili ngohlelo lweSpecial Zimbabweans Exemption Permit.
Abaphethe amaphepha aweSpecial Permit bathi basahlolisisa okufunakalayo ukuze belungise amanye amaphepha. UMnu. Sipho Ngulube, olamaphepha la, uthi usadinga okumele akwenze engakalungisi amaphepha amatsha.
Omunye njalo okumele alungise amaphepha amatsha nguNkosazana Sobala Ndlovu, othi uzabuyela ekhaya kungehlula ukulungisa amaphepha afunwa nguhulumende wakwele South Africa.
UMnu. Ngqabutho Mabhena, umgcinisihlalo wenhlanganiso eyeZimbabwe Community in South Africa, uthi banengi azakwehluleka ukulungisa amaphepha afunakalayo.
UMabhena uthi kumele abantu laba bananzelele ukuthi isikhathi asisekho ngakho-ke kumele balungise amaphepha abo ngokuphangisa.
Uhulumende wakwele South Africa uthi abangenelisi ukulungisa amaphepha la bazasuswa ngenkani elizweni leli kusukela ngomnyaka ka2023.
Your browser doesn’t support HTML5
Abadabuka eZimbabwe Abahlala eSouth Africa Abakaqali Ukudinga Amaphepha Amatsha