UMongameli Emmerson Mnangagwa uthi izithunywa zebandla leAfrican National Congress ezazikwele Zimbabwe ngeviki ephelileyo zazilande ukukhulumisana leziphathamandla zebandla elibusayo hatshi labanye abantu kanye lenhlanganiso ezizimeleyo elizweni.
Iphephandaba leSunday Mail libika ukuthi uMnangagwa wethule lokhu emhlanganweni awenze lamanye amalunga ebandla leZanu PF eNkabazwe ngoMgqibelo.
Uthi wakhuluma loMongameli Cyril Ramaphosa owathuma abantu abambalwa ukuzehlolisisa okwenzakala eZimbabwe.
Uthi watshela uRamaphosa ukuthi akulankinga eZimbabwe ngakho-ke bavumelana ukuthi athume abantu bazezibonela ukuthi kwenzakalani.
Kulabanye abantu leziphathamandla zenhlanganiso ezizimelayo abathi kubotshwa abantu mahlayana eZimbabwe okulabanye njalo abathunjwa ngabacatshangelwa ukuthi baphikisa ibandla elibusayo.
Abanye babotshwa ngesikhathi uzulu elungiselela ukutshengisela emigwaqweni ekhonona ngokungethembeki lokugugudeka komnotho elizweni.
Kasenelisanga ukuxoxa ngaloludaba loMnu. Nick Mangwana, unobhala wohlangothi olubona ngokwethulwa kwemibiko.
UMnu. Innocent Ndibali, okubandla leEconomic Freedom Fighters Zimbabwe, uthi akuqedakali okwenziwa yizithunywa zika Ramaphosa.
Kodwa-ke uMnu. Joseph Tshuma, okubandla leZanu PF, uthi izithunywa lezi ziyakwazi ezikwenzayo.
Your browser doesn’t support HTML5
Bakhathazekile Abanye Abantu Ngokwenziwa Yizithunywa Zebandla leANC eZimbabwe