Umphathintambo wogatsha lwezokuthutha impahla etshiyeneyo kwele South Africa uthi bazawukhomba olotshwala omalayitsha abazama ukungena labantwana beZimbabwe kulelolizwe okungekho emthethweni ngemva kokutholakala komtshova ongelamiqobotsho usubanga ePitoli labantwana beZimbabwe abalitshumi.
Umphathintambo wogatsha lolu lwezokuthutha, uMnu. Fikile Mbalula, utshele abezindaba ukuthi ukhathazekile ngokungeniswa kwabantwana beZimbabwe kuleli ngokungekho emthethweni ngoba lokhu kufana lokutshontshwa lokuthunjwa kwabantwana.
UMbalula uthi ukubotshwa komtshayeli weZimbabwe obesengene elizweni labantwana abalitshumi ngokungelamvumo kutshengisa khona ukuthi loluhlupho ludinga ukuthathelwa amanyathelo abanzi.
“Cabanga abantwana abalitshumi besuka khonale eHarare baze bayefika ePretoria bengelazincwadi behamba ngemota engelamiqobotsho.”
Umgcinisihlalo wenhlanganiso elwela amalungelo abomama labantwana kwele South Africa, uNkosazana Victress Mathuthu, uthi kuyahela ukuzwa indaba ezifana lalezi.
Kodwake uMathuthu uthi lokhu kwenziwa yisimo inengi labazali beZimbabwe abasebenza kwele South Africa abazithola sebephakathi kwaso.
“Ukuthola iphasipoti eZimbabwe kunzima. Bekuvele kuhlezi kuthiwa iphepha lokwenza iphasipoti kalikho. Manje sokungathi likhona kuyabiza kumbe qolo. Abazali bayafisa ukubona abantwana kodwa utholukuthi abanye kabayi emalivini bayasebenza. Siyaxwayisa bakithi abantwana nxa bengelawo amaphepha kungangcono ubabone kanye ngomnyaka ngoJune lapho kuphume khona ileave yakho.”
Inengi labazali like laphatha amathumbu ngezandla emalangeni esanda kwedlula ngemva kwembiko ebithunyelwana ekhasini lefacebook isithi kulabantwana abalitshumi lambili amabhewulwe ngumtshova ngesikhathi bezama ukungena kweleSouth Africa lomalayitsha.
Lobanje iStudio 7 ingatholaka isiqiniseko samapholisa ngaloludaba, umgcinisihlalo wenhlanganiso yeZimbabwe Community in South Africa, uMnu. Ngqabutho Mabhena, uthi kutshengisa khona ukuthi abantwana ababuya ngale indlela abaphephanga.
“Yebo siyaluzwisisa uhlupho olukhona kodwa kuqakathekile ukuthi umzali ahambe ayezithathela umntanakhe ekhaya. Abantu kumele badinge incwadi zokuhambisa ezabantwana kuselesikhathi lalabo ababagcinileyo ukwenzela ukuthi kube lula ukuthi bangene ebhasini babuye eSouth Africa bezobavakatshela.”
UMbalula uthi amapholisa azasebenza gadalala ukuqedalo umkhuba.
“Sizasebenza ndawonye leziphathamandla zeZimbabwe ukuba leqiniso lokuthi amapholisa avimbile emigwaqweni ubusuku lemini.”
Kusenjalo, uMabhena ukhuthaza izizalwane zeZimbabwe ezilubhekise ekhaya ngalesi sikhathi sekhisimusi ukuthi labo abatshayelayo benganathi utshwala njalo bazi ukuthi ukugijima akusikho kufika.
Your browser doesn’t support HTML5
EleSouth Africa Lithi Bazawukhomba Olotshwala Omalayitsha Abathwala Abantwana Okungekho Emthethweni