Amapholisa lamasotsha ngoLwesine batshele abantu ukuthi babuyele ezindlini zabo ngesikhathi uzulu emelele ukutshengisela emigwaqweni ngoLwesihlanu ekhonona ngobukhohlakali lokunye okubahluphayo.
Sokuvinjwa abantu abafuna ukungena edolobheni koBulawayo. (Photo: Bathabile Masuku)
Abantu abakhulume leStudio 7 baveze bathe bekunzima kakhulu ukuthi bafike emisebenzini yabo ngoba amapholisa lamasotsha abevale ngci emgwaqweni engena edolobheni leli.
Omunye wabo nguNkosikazi Siphilile Ncube, ohlala emaphandleni obephethe incwadi yokuhambahamba, walelwe ukudlula.
“Kwathiwa nxa sihamba nguhulumende sithathe incwadi kodwa amapholisa ayasiphendukisa. Ngilayo incwadi khonapha ngifuna ukuya thatha amaphilisi, angila kudla sengibuyele ekhaya ngisuka ekhaya manje kuthiwa sime njani, siyaphila njani. Kufanele ukuthi amapholisa ananzelele ukuthi umuntu uhamba ngaluphi uhlelo nxa bezathatha incwadi yami bethi ayisebenzi so sebefake impilo yami engozini sengizabuyela ekuguleni lamaphilisi ami okungafanelanga ngiwayekele.”
Osakhulayo uMkhokheli Ndlovu uthi okwenziwe ngamasotsha lamapholisa kumtshiye ethithibele.
UNkosikazi Melisa Sithole yena uthi uhle wesaba ukuyafika edolobheni ebona abantu bephendukiswa.