Abantu abakhulume ngoLwesibili kuhlelo Zimbabwe Today – Asixoxeni, olwethulwa ebulenjini bokuzilibazisa obe Facebook kukhasi leVOA Ndebele, bathi akumelanga abesilisa babelesithembo lentombi ezingayaziwa endlini ezibizwa ngeSilungu ngokuthi ngama small houses.
Baphinde bathi labesifazana akumelanga babe labomakhwapheni ngoba lokhu kubhidliza imuli.
Okunye njalo bathe kulabesifazana abaxotsha amadoda ezindlini ngokungaziphathi kahle njalo lokugqoka engani umuntu yisivande esibiywe ngameva.
Abakhulume kuhlelo lolu bagoqela umsakazi olodumo, uMnu. Ezra Tshisa Sibanda, uMpostoli Midian Dube, Nkosazana Musawenkosi Ndlovu loNkosikazi Sakhile Lilly Nair, omele ilungelo labesifazana, loMnu. Thakazela Ncube, isizalwane seZimbabwe esihlala kwele South Africa.
USibanda uthe kwesinye isikhathi abesifazane bayazenzela ukuthi babalekelwe ngamadoda.
“ … Omama kabenzi kahle kwesinye isikhathi okwenza ukuthi obaba babaleke baye kuma small houses okungani kusezulwini ngoba uyabe ubanjwabanjwa, uqumbaqumbwa, usenziwa lokhu okuthiwa yi-massage lokunye okufanayo ongeke wakuthola ngekhaya.”
UMpostoli Dube uthe kuliqiniso ukuba abesifazana baxotsha abesilisa ngoba kwesinye isikhathi abantu abendileyo kabagezi.
Uthe abanye babo bayabe sebengonaka mdlopha njalo bengasaphekeli lokugqoka okuvuselela uthando.
Uthi konke lokhu kulungiswa yikukhulumisana ezindlini.
UMaNdlovu uthe okumangalisayo yikuthi umuntu wesifazana uthwaliswa amagabha avuzayo nxa etholakele elomakhwapheni kuthi-ke owesilisa kuyabe kuthiwa yi-small house.
Uthe kumele silingane isijeziso esifakelwa abantu abatshadileyo abatholakala beganga.
UNkosikazi Nair laye ukubeke sobala ukuthi angeke avume ukuthi angene esithenjini ngoba kafuni ukwabelana indoda yakhe labanye abantu.
Your browser doesn’t support HTML5
Bayahlupha Ezindlini Omakhwapheni Lama Small Houses