Abazali abadingela abantwana indawo yezinga lika Form 1 bathi kabasakwazi ukuthi benzene njengoba izikolo zivaliwe njalo kulohlelo lokuvalela uzulu ezindlini olweCOVID-19 lockdown.
Abazali bakhala ngemigoqo yokubavimbela ukuba bayefika ezikolo ezitshiyeneyo labantwana babo.
Ezinye izikolo kazikaqali ukwamukela abantwana abalobe baphumelela imihloliso yezifundo zika Grade 7.
Izikolo ezilabantwana abafunda behlala khona, amaboarding schools, inengi lazo zisebenzisa ubulembu beInternet (online enrollment) ukuthatha abantwana abatsha. Kuthi lezi ezinye abantu kumele bayefika kizo. KoBulawayo abazali sebeqalile ukubhodabhoda bedinga indawo, ezinye izikolo zisithi zisaqala zithathe abafundi abathole imiklomelo emihlanu kusiya kwelitshumi lambili, kuthi ezinye zisithi zizaqala ukubhalisa ngeviki ezayo.
UNkosikazi Thobekile Tshuma, ngomunye wabazali olomntwana odinga indawo yezifundo zika Form 1.
“Kunzima kakhulu nxa isimo sinje ngoba i-transport yokuthi uyedinga kwezinye izikolo asivunyelwa ukuthi sihambe, awutholi transport nxa ungela ngcwadi. Eyinye inkinga esilayo yikuthi asikwazi lokuthi izikolo zivulwa nini, sungadinga sibili kodwa ukulungiselela kwakhona kunzima ngales’isikhathi ngoba uyabe ungakwazi ukuthi wenzeni uqale ngaphi ucine ngaphi.”
Omunye njalo umzali, uNkosikazi Ruth Gabaza, ukhala ngohlupho lwemali yokubambisa indawo eyedeposit.
“Izikolo esengike ngabhoda kizo bezisisithi zona azikathathi, besithi abantu babuye ngoMvulo, ugaurd kunguye obephendukisa abantu egedini. Okunye engikubonayo yikuthi ukudinga kwendawo lokhu kufike kuphakathi kwesikhathi kungakafiki i-monthend. Nxa usuyitholile indawo kufanele ubambise indawo ngokubhadala imali. Kunzima kakhulu ngoba okwakhathesi imali lezi ezifunekayo asilazo ngapha labantwana abenzanga kuhle sithwala nzima sidinga indawo.”
UNkosikazi Sukoluhle Ndlovu, umgcinisihlalo weMatabeleland North enhlanganweni yababalisi eyeAmalgamated Rural Teachers Union of Zimbabwe, uthi uhlelo lokubhalisa uForm 1 lonyaka lwehlukile.
“Ama results sephumile awabo Grade 7, sibabona bedinga izindawo kodwa nxa sikhangela ukupasa kwabantwana sibona ukuthi abanengi abenzanga kuhle. Lokhu kwabangelwa yiCOVID lokuthi ababalisi bebengafundisanga ngendlela eyiyo ngoba bebesakhonona kuhulumende ukuthi abangezelele iholo. Nxa sikhangele futhi ekudingeni indawo kulokuhlupha okuthize njalo abazali abalazo imali zokubambisa. Kunje ischool fees zikhwelile ababalisi labo ngabazali balabantwana abafundayo. Imali abayiholayo laleyi okumele bayibhadale akuhambelani.”
Nkosikazi Yolanda Dube, wemzini weNkulumane koBulawayo, uthi uthwaliswe nzima yikubhalisa umntwana ebulenjini beInternet.
“Mina bengilo muntu ongidingela indawo kaForm 1. Uthe uzangazisa ngokwenzakalayo. Bengingakaze ngidinge okuya khatshana ngoba kuma online kuyahlupha vele ukudingela umntwana indawo. Sengilinde ukuzwa kulo ongidingelayo indawo.”
Umsekeli wesikhulumeli sogatsha lwezemfundo, uMnu. Patrick Zumbo, wenqabe ukuthatshwa ilizwi kodwa utshele iStudio 7 ukuba izikolo seziphiwe imvumo yokwamukela abafundi abazaqala uForm 1 njalo lokuba ezinye zezikolo ezilabafundi abafunda behlala khona sezigcwele.
Izikolo zazikhangelelwe ukuvulwa mhlaka 4 Zibandlela lonyaka kodwa kwadluliswelwa phambili ukuvulwa kwazo ngenxa yokukhuphuka kwenani labantu abafunyanwa belegcwiwane le COVID-19 obe sokusethusa.