Abantwana besikolo seNjube Secondary School namuhla batshengisele emigwaqweni besithi kumele uMongameli Emmerson Mnangagwa angenele kokwenzakala kwezemfundo.
Abantwana laba batshengisele emigwaqweni bethwele umfanekiso kaMnangagwa behlabela ingoma edumileyo eveza ukuthukuthela ethi “into ayenzayo bayayizonda”.
Bathi bathwele nzima ngoba kabasafundi ngenxa yokukhuphuka kwenhlawulo yemfundo, intengo yezigqoko zesikolo kanye lokungafundi ngoba ababalisi bakhalala umsebenzi.
Omunye wabantwana abafunda eNjube High School, uNdalwenhle Ngwenya, uthi uhulumende kumele angenele kwezemfundo.
“Thina njengabantwana besikolo siyadubeka kakhulu ngendlela izinto ezenzakala ngakhona lapha eZimbabwe. Ama teachers awakho esikolweni abazali bayakhala ukuthi ischool fees siyadula, mina lapha engihlala khona ngiyagada insuku zonke ngibuya esikolo ngithole ababalisi bengakho. Ngingabuyela ngekhaya ngithola abazali bekhala ngokwenzakala ezikolo. Sicele ukuthi uhulumende angenele ngoba lokhu sokuphezu kwamandla ethu.”
INjube High School kukhanya isiveze ukufuthelana kwabantwana besikolo ngokwenzakala ezikolo.
Omunye njalo ofunda esikolo lesi, uBlessing Moyo, uthi kukhitshwa imali enengi ukuthi bafunde kodwa akulalutho abalutholayo.
“Thina njengabantwana besikolo abazali bethu babhadala imali ezinengi kodwa asifundi lezikolo selokhu izikolo zavulwayo asikaze sifunde yikho okusenze satshengisela emigwaqweni namuhla sisithi izinto kazitshintshe.”
Umzali uNkosikazi Sibongile Tshuma uthi abantwana bathi bafuna ukufunda njengoba ababalisi bekhalele umsebenzi bethi iholo abalitholayo incane kakhulu.
Uhulumende uhlala ekhala ngodubo lokuswela imali ethi kenelisi ukunika ababalisi iholo abalifunayo elilingana lesisindo sedola leMelika emkambo wemali.
Asenelisanga ukukhuluma lompathintambo wezemfundo, uMnu. Cain Mathema, ngokutshengisela kwabafundi lokhu ngoba ubengasabeli umakhalekhukhwini wakhe.
Your browser doesn’t support HTML5
Batshengisela Emigwaqweni Abantwana Besikolo
Abazali abanengi lengcwethi kwezemfundo bathi bakhathazekile ngokuwa kwesisindo semfundo eZimbabwe ngenxa yokukhalala umsebenzi okwenziwa ngababalisi abakhonona ngeholo eliphansi njalo langokukhuphuka kwenhlawulo yezifundo.
Bathi lokhu yikho okwenze izifundi zeNjube High School ngoMvulo zitshengisele emigwaqweni zikhonona ngokwenzakala ezikolo.
UGibbs Dube weStudio 7 uxoxe ngobaba lolu loDokotela Sifiso Ndlovu wenhlanganiso yababalisi eyeZimbabwe Teachers Association, uMnu. Believe Gaule, owebandla leZanu PF labalandeli bomsakazo weStudio 7.
Your browser doesn’t support HTML5
Bayakhala Okumangalisayo Abazali Ngokwenzakala Ezikolo