UMongameli Joseph Biden uthi eleMelika lizafakela izijeziso zenotho umkhokheli wakwele Russia, uMnu. Vladmir Putin, oqhubekela phambili efuna ukuhlasela eleUkraine.
I-Associated Press ibika ukuba Biden wethule lokhu izolo kusihlwa ngesikhathi ekhuluma lentathelizindaba ngomumo owethusayo emngceleni wakwele Ukraine lapho eleRussia eselifake ibutho elihlome laphelela limelele ukubikelwe nguPutin ukuba lenze njani kusiyaphambili.
Kodwa uMnu. Dmitry Peskov, isikhulumeli sika Putin, uthi izijeziso zenotho ezingafakelwa umkokheli wakwele Russia zingababuhlungu loba zingasoze ziguqule izenzo zakhe.
EleRussia lisola ukuba eleUkraine lingene kumanyano wamazwe ezwekazi leEurope oweNorth Atlantic Treaty Organization kumbe iNATO, evikela ngezikhali nxa amazwe akumanyano lo engahlaselwa.
UMnu. Rejoice Ngwenya, ingcwethi kwezombusazwe, ithi ukulwisana kwelizwe leRussia leleUkraine kwaqala ngesikhathi kubhidlika umanyano oweUnion of Soviet Socialist Republics (USSR).
UNgwenya uthi kumele ibutho lakwele Melika liyelwisana lebutho lakwele Russia ukuze kuvinjwe ilizwe leli ukuba lingahlaseli eleUkraine.
Uthi eleUkraine lilakho njalo ukuvala impompi ethwala umlilo kagetsi ezixhumanisa ilizwe leli lamanye akuzwekazi leEurope.
UNgwenya uthi izijeziso zenotho kuphela zingeke zemisa uPutin ukuba ahlasele ilizwe leli.
Kubikwa ukuba ukudabuka komanyano wamazwe aweUSSR kwacaphula kakhulu uPutin, ofisa ukuba ngesikhathi etshiya intambo zombuso wonke amazwe ayephansi kwele USSR esebuyele kwele Russia.
Your browser doesn’t support HTML5
Ingxoxo Esiyenze loMnu. Rejoice Ngwenya