Abantu abanengi eZimbabwe bathi akukhanyi kahle ukuba sekulenguquko eZimbabwe kulandela ukusuka kowayengumongameli umuyi uRobert Mugabe esikhundleni mhlaka 21 Lwezi ngomnyaka ka2017.
Lolu lusuku uMugabe atshela idale lephalamende ukuba usetshiya umsebenzi ngokufisa kwakhe hatshi ukubanjwa ngamandla. Wayesegonjolozelwe libutho njalo idale lephalamende lalifuna ukumsusa esikhundleni lisebenzisa isisekelo sombuso welizwe.
Incwadi kaMugabe eyokutshiya umsebenzi yabalwa nguMnu. Jacob Mudenda, usomlomo wedale lephalamende.
Kodwa ngokuya kwesikhathi uMugabe wathi wabanjwa ngamandla ukuba asuke esikhundleni. Kwehlula ukuba abiselwe esikhundleni kulandela ukungenele kwenhlanganiso yeAfrican Union. Omunye wabancedisa kudale lephalamende ukuba kususwe uMugabe esikhundleni nguMnu. Joseph Tshuma, owayemele ngalesosikhathi iPelandaba/Mpopoma.
Abaphikisayo bathi akulalutho olwaguqulwa yikusuka kuka Mugabe esikhundleni. UMnu. Mqondisi Moyo, umkhokheli webandla leMthwakazi Republic Party, uthi ibutho yilo elasusa uMugabe ngenkani esikhundleni ngakho-ke akulanguquko esiyenzwe nguMongameli Emmerson Mnangagwa, owangeniswa esikhundleni sikamongameli ngodlame.
Lokhu kusekelwa nguMnu. Edwin Ndlovu, okubandla leMDC Alliance, othi akulanguquko ekhanyayo selokhu uMugabe wasuswa esikhundleni.
UNdlovu uphinde wathi kwaphuma uMugabe kwangena abanye abafanayo embusweni.
Kulokufuthelana eZimbabwe ngokwenzakala elizweni kulabanye abathi uMugabe loMnangagwa zimbila zantabanye.
Your browser doesn’t support HTML5
'Kwasuswa Esikhundleni uMugabe Kwangeniswa Ofana Laye uMnangagwa'